МЗХ болон ТББ-уудын үндэсний нэгдлээс өнөөдөр мэдээлэл хийлээ. Тэд "Хар жагсаалт"-ыг энэ сарын 20-нд зарлахаа дуулгав. Харин "Цагаан жагсаалт"-ыг зургаадугаар сарын 11-нд олон нийтэд ил болгох гэнэ.
Үүнтэй холбогдуулан тус нэгдлээс "Хар жагсаалт"-д орсон хүмүүсийг сонгохгүй, нэрийг нь дэвшүүлэхгүй байх уриалгыг УИХ болон орон нутгийн сонгуульд оролцох нам эвслийн дарга нарт хүргүүлжээ. Мөн тус уриалгадаа 1992 оноос өнөөг хүртэл үйлдэгдсэн “ 100 хар үйл явдал ”-ыг санаачлан хэргжүүлээгүй, нэр холбогдоогүй улстөрчдийг 2016 оны сонгуульд нэр дэвшүүлэхийг уриалсан байна.
МЗХ-ний Ерөнхийлөгч А.Мөнхбат "Хар болон цагаан жагсаалтад орсон хүмүүсийг дан ганц залуучуудын байгууллага тодруулах нь өрөөсгөл. Иймээс үндэсний хэмжээний 76 төрийн бус байгууллагууд нэгдэж хамтын ажиллагааны гэрээ байгуулж асуудалд хандах нь зүйтэй гэж үзсэн. Энэ хүрээнд нэгдэх уриалга санаачилгыг хэрэгжүүлснээр энэ сарын 1-нд хариуцлагын хэлэлцээрт гарын үсэг зурлаа. Бид нэгдснээр салбарын хамрах асуудал, эрх ашиг, бодлогыг шийдвэрлэж, УИХ болоод орон нутгийн ИТХ-д суух итгэл дааж чадахуйц төлөөлөлтэй болох боломж харагдаж байгаа ” гэлээ.
В.Бат
Уншиж байна |