УИХ дахь МАН-ын бүлэг хэвлэлийн бага хурал хийлээ. Хэвлэлийн бага хуралд УИХ-ын дэд дарга, МАН-ын дарга М.Энхболд, УИХ дахь МАН-ын бүлгийн дарга С.Бямбацогт, гишүүн Д.Оюунхорол нар оролцов.

УИХ-ын дэд дарга, МАН-ын дарга М.Энхболд:

-Өнөөдрийн Төрийн байгуулалтын байнгын хорооны хурлаар СЕХ-ноос өргөн мэдүүлсэн УИХ-ын 2016 оны сонгуулийн тойрог хуваарилах төсөл хэлэлцлээ. Төслийг хэлэлцэх явцад УИХ дахь АН-ын бүлэг, түүний ажлын хэсэг гэх 4 нөхөр СЕХ-ны оруулж ирсэн саналыг ихээхэн хэмжээгээр өөрчилж, будилаантуулж, өөрсдөдөө ашигтай тойрог байгуулах, хүн амын тоог харгалзалгүйгээр аймагт тойргийн тоог нэмэх гэх мэтээр зарчимгүй, будилаантай үйл ажиллагаа зохион байгууллаа. Энэ хурлаар гишүүдийн ирцийн олонхиор давамгайлж, гаргасан саналаа бүгдийг нь дэмжүүлсэн. Ингэснээр 2016 оны сонгуулийг будилаантуулах эхлэлийг АН өнөөдөр тавилаа. Сонгуулийн тойрог, мандатыг хувааж, хуваарилах нь нэгдүгээрт, нутаг дэвсгэрийг харгалзсан зарчим байх ёстой. Хоёрдугаарт, Засаг захиргааны нэгжийн адил тэнцүү байх зарчим үйлчилнэ. Гуравдугаарт, хүн амын тоо тухайн аймгийн тойргуудад ойролцоо хуваарилагдсан байх ёстой.

Үүний үндсэн дээр сонгогчид өөрсдөө сонголтоо хийх боломжоор хангагдах ёстой. Гэтэл өнөөдөр аймаг орон нутгийн сонгуулийн тойргийг иргэдийн урд өмнө өгсөн судалгаан дээр үндэслэн янз бүрийн байдлаар тойргийн хуваарилалтыг өөрчиллөө. Тойрог бат цул байх зарчмыг алдагдууллаа. Аймгийн сумдыг энд тэндээс нь хольж тавих, аймгийн төвийг дангаар нь нэг тойрог болгон бусад олон сумыг хамарсан тойргийг гаргах зэрэг адил тэнцүү бус зарчмыг баримталсан саналуудыг гаргалаа. Үүнд МАН-ын бүлгийн гишүүд байр сууриа илэрхийлж оролцсон.

Харамсалтай нь бид цөөнх учраас гаргасан алдаа дутагдлыг засч, залруулж чадсангүй. Тийм учраас МАН-ын бүлгийн гишүүд хурлыг  орхиж гарсан. Тиймээс сонгуулийн тойрог, мандат хуваарилсан шийдвэрээ эргэж харахыг шаардаж байгаа юм. Өнгөрсөн дөрвөн жилийн хугацаанд иргэдийн аж амьдрал яаж доройтож, доошлов, эдийн засаг яаж доош унасан бэ. Одоо эцэст нь өөрсдийн рейтэнг унаж байгаа энэ байдлуудаа сонгуулийг будилаан луйвраар хаацайлж, ирэх он жилүүдэд эрх мэдлээ эдлэх оролдлого хийж эхэллээ гэж үзэж байна. Тийм учраас сонгуулийн үед иргэд олон нийтийг сонор сэрэмжтэй байхыг хүсч байгаа.

УИХ дахь МАН-ын бүлгийн дарга С.Бямбацогт:

-Айхаа арьсандаа, ичихээ эсгийдээ боосон хүмүүс гэвэл АН-ынхныг хэлэхээс өөр аргагүй болж байна. Дөрвөн жил нэг удаа болдог ард түмний сонголтыг АН-ын сонгууль, АН-ын сунгалт болгох гэж байгаад харамсаж байна. УИХ 76 гишүүнтэй. 76 гишүүний саналаар асуудлыг шийддэг. Энэ эрхийг зөвхөн АН-д давуу тал болгох гэж байгаа сунгалт болгох гэж байгаа нь харамсалтай.  Өнөөдөр Н.Батбаяр, Р.Гончигдорж, Х.Тэмүүжин Б.Гарамгайбаатар гэсэн дөрвөн хүний саналаар сонгуулийн тойргийг хуваарилах зарчим алдагдаж, зөвхөн өөрсдөдөө таалагдсан маягаар хандаж байгаа нь харамсалтай байна. 21 аймгийн 76 мандатыг энэ 4 гишүүний үзэмжээр шийдэж байгаа. Жишээ нь Өвөрхангай аймагт сонгуулийн хуульд заасан зарчмуудыг бүгдийг нь алдагдууллаа. Нийт нутаг дэвсгэрийн 86 хувь нь нэг тойрог болсон. Аймгийн төв нь мөн нэг тойрог болсон. Үлдсэн 5 сум нь нийлээд нэг тойрог болжээ. Үүнд нутаг дэвсгэр, хүн ам, засаг захиргааны ижил тэнцүү байдлыг харж хуваах ёстой. Энэ байдал алдагджээ. Хууль зөрчиж хийж байгаа энэ алхмуудаа засахыг шаардаж байна хэмээв.

Н.Энх