УИХ-ын гишүүн асан, Нэг Монгол ТББ-ын тэргүүн Г.Занданшатар болон Баянхонгор аймгийн МАН-ын хорооноос мэдээлэл хийв. Тэрбээр эрх баригчдын увайгүй, хүч түрэмгийлсэн үйлдэл шударга бус сонгууль явагдахад хүргэж буйг дуулгав. Тиймээс НҮБ-ын сонгуулийн туслалцааны хэлтэст хандан гомдол санал явуулж, тусламж хүсэхээр болсноо хэвлэлийн хурлын үеэр хэлэв. 

Г.Занданшатар "Сонгуулийн хуулийг сонгууль болохоос зургаан сарын өмнө хэлэлцдэг. Гэтэл өнөөгийн УИХ сарын дараа болох сонгуулийн эрхзүйн харилцааг эцэслээгүй байна" хэмээгээд энд Үндсэн хуулийн цэц ч буруутай гэв. Тиймээс сонгууль будилаантаж, асуудал үүсвэл цэц ч хариуцлага хүлээх ёстой гэж хэллээ. 

Тэрбээр өөр нэг мэдээлэл хийсэн нь Баянхонгор аймгийн МАН-ын байрыг хураасан тухай байв. Хэд хоногийн өмнө тус аймгийн МАН-ын байрыг хураасан байна. Тус байрыг МАН-ын ахмадууд хөлс, хөрөнгөө гаргаж, өөрсдийн хүчээр барьсан. Гэтэл АН-ынхан байрыг нь хурааж байгаа нь эрх мэдэл, суудлаасаа буухгүйн тулд юу ч хийхээс буцахгүй байгаагийн илрэл хэмээн Баянхонгор аймгийн МАН-ынхан үзж буй аж. Энэ асуудлаар Баянхонгор аймгийн МАН-ын хороо Хүний эрхийн үндэсний комисс, НҮБ-ын Хүний эрхийн хороонд мэдэгдэл хүргүүлж, сонгож, сонгогдох эрхээ хамгаалахаа илэрхийллээ. 

В.Бат