УИХ-ын гишүүн М.Батчимэг “Тагнуул хэмээх тусгай ажиллагаа” нийтлэл сайтад тавигдсан. Үүнтэй холбогдуулан   УИХ-ын гишүүн О.Баасанхүү мэдээлэл хийлээ. Тэрбээр мэдээлэлдээ:

-“Тагнуул хэмээх тусгай ажиллагаа” гэсэн 10 гаруй хуудас захиалгат  нийтлэлдээ гишүүн М.Батчимэг миний нэрийг дурдаж, гүтгэсэн байна. Үүндээ намайг Орхон аймагт нэр дэвшихээр зарлаж  байна гэжээ. Ер нь Монгол Улсын хуулиар  хаана ч нэр дэвших нь нээлттэй. Гэхдээ миний бие МАХН-ын бодлогоор Орхон, Ховд, нийслэлийн Чингэлтэй, Сонгинохайрхан дүүрэгт ажлаа тайлагсан. Манай дээрх аймаг, дүүрэгт квоттой юм.  Мөн О.Баасанхүү тагнуултай холбоотой асуудлыг сөхсөн талаар дурджээ. Миний бие Тусгай хяналтын дэд хороонд 2 жил байсан. Гэнэт миний зөвшөөрөлгүйгээр энэ хорооны гишүүнчлэлээс намайг хассан. Тусгай хяналтын дэд хороо бол улсын аюулгүй байдалтай холбоотой нууцын асуудлыг хэлэлцдэг. Төрийн нууцын тухай хуулийг хаалттай  хэлэлцэхэд би Тусгай хяналтын дэд хорооны дарга Г.Батхүүгээс  М.Батчимэгийн туслах Пагмажавтай холбоотой асуудлыг асууж байсан. Гэтэл энэ асуудлаар нэр холбож гүтгэж байгаад гайхаж байна. Төрд авлигач, алчуурчин, хулгайч байж болно. Харин эх орноосоо урвагч байж болохгүй.

З.Пагмажавын холбогдсон хэрэгт Чинбаяр гэж хүн ял авсан. Одоо З.Пагмажав шалгуулж байгаа. Мэдээж УИХ-ын гишүүний хувьд зөвлөх нь асуудалд холбогдохоор санаа зовох нь зүйн хэрэг. Гэхдээ энэ асуудлаар М.Батчимэг ч, би ч элдэв зүйл яриад явах хэрэггүй. Үнэн зөвийг нь олж тогтоогоосой гэж  бодох хэрэгтэй.   80 жилийн түүхтэй тагнуулын байгууллагыг би төрийн төлөө үүргээ сайн гүйцэтгэн ажилладаг гэж итгэдэг.

Харин миний хувьд энэ асуудлаар  нэр төрөө сэргээлгэхээр хуулийн байгууллагад хандана хэмээлээ.

Н.Нягт