Сум нэвтэрдэггүй хантааз гэдэг шиг хэрвээ улс төрчийн үр хүүхэд, ах дүү, хамаатан садан л бол хэзээ ч хамаагүй, хаанаас ч ирж болох хурц үзүүртэй үгэнд цоорохгүй байх дархлаатай байх хэрэгтэй. Мөн бие болоод сэтгэл санааны өндөр бэлтгэлтэй байхыг Монголд өрнөж эхэлсэн, өрнөсөөр буй халуун үйл явдлууд анхааруулж байна. Эцэг, эх, эх орноо сонгож төрж чадахгүйгээс хойш энэ бүгдийг дааж амьдрахаас өөр аргагүй ажээ.

Албан тушаалын хэнээрхэл, ашиг сонирхлын зөрчил, бие биенээ ялах тэмцэл эцэстээ гэр бүл рүү нь дайрч дуусдагийг харлаа. Улс төр дэх ийм муу жишиг Монголд хэдийнэ үүрээ зассан байна. Гэхдээ энэ бол улс төрд байж болох хамгийн увайгүй, ичгэвтэр, шударга бус тоглоомын туйл гэдгийг хэлэх нь зүй биз. Харин цэвэр, шударга өрсөлдөөн бол хийсэн ажил, үйлдэл, хэлэх үгтэй л холбогдох ёстой юм.

Тэгвэл ядарсан энэ улс төрийн арга хамгийн хор уршигтай гэдэг нь урд өмнө нотлогдсон. Өмнөх Засгийн газрын тэргүүний жишээг энд дурдаж болно. Түүний охины компани, ажил, амьдралыг улс төрийн тоглоомдоо татан оролцуулж аажмаар гүйцэтгэх засаглалын тэргүүнээс буулгасан байдаг. Яг үүнтэй ижил жишээ тэгвэл хотын даргад чиглэлээ. Түүнийг татан унагах гэсэн оролдлого түүн рүү биш үр хүүхэд, гэр бүлд нь нөлөөлж эхлэв. Нөгөө талдаа үүнийг хийсэн ажлыг нь шүүмжилж чадахгүй арга ядахдаа гаргаж буй үйлдэл гэж дүгнэж болно.

Нийслэлд өмнө нь баригдаж байгаагүй урт, чанартай зам, олон сургууль, цэцэрлэгийн бүтээн байгуулалтыг өнгөрсөн дөрвөн жилийн хугацаанд хийчихлээ. Нүдэнд ил энэ бүгдийг мэдээж шүүмжилж, гутааж чадахгүй. Баллуурдах гэж хамгийн их оролдож байсан гэр хорооллын дахин төвөвлөлт төсөл ч гацаанаас гарсан учраас чимээгүй болчихлоо. Одоо харин шүүмжлэх зүйл юу ч үлдээгүй учраас нэр төрийг нь гутаан доромжлох, гүтгэн унагах гэсэн “хар” арга хэрэглэхээс өөр сонголт үлдээгүй. Гэхдээ үүнийг нэг их тоох хэрэггүй л болов уу. Ичсэн хүн, хүн ална гэдэг шиг аргаа барж, тартагтаа тулсан хүмүүсийн хийдэг л зүйл. Үлдсэн ганц аргаа хэрэглэж л байг.

Одоогийн хотын даргыг хамгаалах гэсэндээ биш, бодит үнэн дээрээ тулвал өмнөх Засаг дарга нараасаа хамаагүй их ажил, их бүтээн байгуулалт хийсэн нь, хийж байгаа нь харагдсаар л үнэн. Түүнийгээ л үргэлжлүүлэг. Эцсийн дүндээ нийгэмд хамгийн нэр хүндтэй байгаа хүн рүү дайрах нь гарцаагүй. Юу ч хийгээгүй хүнийг хэн л тоож харав гэж. Нөгөөтэйгүүр дайрч давшлах, гүтгэн доромжлох, гэр бүлийнх нь нэр төрд халдах нь зөвхөн сонгуультай ч холбоогүй. Ухаандаа өмнөхөөс нь, өөрсдийнхөөс нь илүү гарчих вий гэсэн айдас л тэднийг энэ чиглэлд хөтлөөд байгаа юм.

Эсрэгээрээ тэгвэл улс төрийн шударга бус тоглоом тоглож буй хүмүүсийнхээр хэн хотын дарга болох ёстой гэж. Одоогийн дарга солигдлоо гэхэд хэн түүний эхлүүлсэн энэ их ажлыг үргэлжлүүлэх юм. Өмнө нь мээр байсан Н.Батбаяр уу, Г.Мөнхбаяр уу, М.Энхболд уу эсвэл бүр хэний ч танихгүй газрын дарга уу. Үгүй. Нийгэм, нийслэлчүүд үүнийг хүлээн зөвшөөрөхгүй. Бодит байдал, ирээдүйгээ харж ард түмэн асуудалд ханддаг болсон.      

Х.Гарьд