Нийслэлийн МАН-ын хорооны дарга Ц.Сандуй энэ удаагийн НИТХ-ын сонгуулийн 18 дугаар тойрогт МАН-аас нэр дэвшиж буй. Тэрбээр өнөөдөр Сонгинохайрхан дүүргийн 4, 5, 26, 27 дугаар хорооныхоо иргэд сонгогчидтойгоо уулзаж, мөрийн хөтөлбөр, дэвшүүлсэн бодлогоо танилцууллаа. Ц.Сандуйгийн аав Ж.Цэндсүрэн нь Сонгинохайрхан дүүргийн анхны Засаг даргаар ажиллаж, дүүргийн тулгын чулууг тавилцсан гавьяатай цөөн хүний нэг. Нэр дэвшигч Ц.Сандуйн төрийн ажлын анхны гараа ч Сонгинохайрхан дүүрэгт газрын төлбөрийн байцаагчаар ажилд орсноор эхэлсэн байдаг. Түмэн олноо төрд төлөөлж Дүүргийн ИТХ-д сонгогдсон тойрог нь ч Сонгинохайрхан дүүргийн 4, 26 дугаар хороо. Тийм учраас тэрбээр дүүрэг хорооныхоо иргэдийг төрд төлөөлөхөөр НИТХ-д нэр дэвшин өрсөлдөж байгаа ажээ.
Нэр дэвшигчтэй уулзах уулзалтад ирсэн иргэд “Улс орон хэцүүдсэн, их өрөнд баригдсан, иргэд нь ядуурсан нийгэмд МАН улсаа, засаглалаа, иргэдээ аварч байсан түүхэн туршлагатай улс төрийн хүчин. Залуус ирээдүйдээ санаа зовж, хотоо, улсаа хөгжүүлэхээр, ачааны хүндийг үүрэлцэхээр ирж байгаа нь сайн хэрэг. Одоо улсын хөгжлийг залуус түүчээлэх цаг нь ирсэн” гэж ярьж байлаа. Мөн иргэд “Засаглалын хямрал, өрийн дарамтаас гаргах чадварлаг, чадалтай, өндөр боловсролтой залуу боловсон хүчнээ МАН илгээсэн байна. Энэ цаг үед яах аргагүй иргэд биднийхээ төлөө хийж бүтээх сэтгэлтэй залуус хэрэгтэй байна. Бидний мэдэх чадварлаг залуу удирдагч Ц.Сандуйг болон түүний багийг дэмжих болно” хэмээн өгүүлж байлаа.