НИТХ-ын сонгуульд Хан-Уул дүүргийн 36-р тойрогт МАН-аас нэр дэвшигч Б.Цэрэн нарын хүмүүс мэдээлэл хийлээ. Тэд Нийслэлийн Засаг дарга Э.Бат-Үүлын хүү Б.Чулуудайн оффшор дансны асуудлаар мэдээлэл хийв.
Нэр дэвшигч Б.Цэрэн хэлэхдээ “Энэ тойрогт АН-аас хотын дарга Э.Бат-Үүл нарын 6 нэр дэвшигч өрсөлдөж байгаа. Би өрсөлдөгчийн хувьд Э.Бат-Үүл дарга шударга өрсөлдөхгүй байна гэж үзэж байна. Учир нь тэрбээр сүүлийн үед хэвлэл мэдээллийн хэрэгслээр сонгогдчихсон юм шиг, дахин хотын даргаар ажиллах юм шиг ярьж байгаа нь энэ тойрогт нэр дэвшиж буй бусдыгаа доромжилсон, басамжилсан үйлдэл. Тийм учраас өнөөдөр би зарим нэг асуултанд нь хариулт авах гэж өөрийн биеэр далд биш ил үгээ хэлэхээр энд хүрэлцэн ирлээ.
Тэрбээр хүүгийнх нь нэр дээрх дансаар гүйлгээ хийгдсэн байвал өөрийн хүсэлтээр албан тушаалаасаа огцорч, сонгуульд нэр дэвшхээс татгалзана гэж олон нийтийн өмнө хэлж байсан. Тэгвэл хүү Б.Чулуудай нь нэг биш нэлээд хэдэн оффшор данстай, тухайн дансаараа тодорхой хэмжээний гүйлгээ хийсэн байна гэдгийг “Монгол HD” телевиз олон улсын эрэн сурвалжлах байгууллагаас иш татан мэдээлэл гаргасан байна. Тойрогтоо ажиллаад сонгогч нартай уулзаад явж байхад ард түмэн энэ нэвтрүүлгийн талаар байнга асууж байна. Нэвтрүүлэг гараад 7 хоног орчим хугацаа өнгөрчихөөд байхад Э.Бат-Үүл дарга энэ талаар огт хариу өгөхгүй байгаа нь ямар учиртай юм бэ. Яагаад огцрохгүй байна вэ гэдэг асуултыг иргэд сонгогчтой уулзах мөч болгонд надад тавьж байна. Тэгэхээр иргэдийн үгийг дамжуулж би өнөөдөр Э.Бат-Үүл даргаас энэ асуултыг асууя гэж бодож байна. Хэрэв “Монгол HD” телевиз хүн гүтгэж байгаа бол гаргасан мэдээлэлдээ няцаалт өг. Харин үнэн бол Э.Бат-Үүл даргыг хариулт өгөх шаардлагатай байна. Э.Бат-Үүл даргаа та асуултад зоригтой хариулт өгөөч” хэмээв.
Тэрбээр дээрхи асуулгынхаа хариуг энэ сарын 20-ны даваа гарагт багтаан авна. Хариулт өгөөгүй тохиолдолд нэр дэвшигчийн, өрсөлдөгчийн хувьд энэ асуудлыг тэмцлийн хэлбэрт оруулна гэдгээ мэдэгдэв. Юуны түрүүнд нэр дэвшигчийг татах асуудлаар Нийслэлийн сонгуулийн хороонд асуудал тавих болон огцруулах асуудлыг холбогдох газруудад тавина гэдгээ хэллээ.
Г.Тэгшсүрэн