Афганистан гаралтай Омар Матин гэгч Орландо хотноо халдлага үйлдэхээсээ өмнө 911 рүү хэд хэдэн удаа залгаж, өөрийгөө халдлага үйлдэх гэж буйгаа мэдэгдсэн талаар хэвлэлийнхэн мэдээлсэн билээ. Тэгвэл уг мэдээллийг Холбооны мөрдөх товчоо шалгаж, Матиныг 911 рүү гурван удаа залгасан болохыг тогтоожээ. Холбооны мөрдөх товчоо өчигдөр хэвлэлийнхэнд Матин болон цагдаагийн жижүүрийн хооронд яригдсан эхний яриаг үзүүлсэн байна. Эхний дуудлага 50 секунд үргэлжилжээ.
Цагдаагийн газрын жижүүр: Орландогийн цагдаагийн газрын жижүүр сонсч байна?
Омар Матин: Намайг Омар Матин гэдэг.
Цагдаагийн газрын жижүүр: 911 таны мэдээллийг бүртгэж байна.
Омар Матин: Бурханы нигүүсэл бидэнд өршөөнгүй байхыг заадаг. /арабаар/
Цагдаагийн газрын жижүүр: Та юу гэсэн вэ?
Омар Матин: Бурхан намайг магтах болно. Би залбирлаар амар амгаланг олдог. /арабаар/. Бурхан зааварчилсан. Би Орландод байна. Та удахгүй бүх зүйлийг мэдэх болно.
Цагдаагийн газрын жижүүр: Таны нэр?
Омар Матин: Миний нэр бол Исламын дайчин. Би Бакар аль Багдадигийн дэмжигч.
Цагдаагийн газрын жижүүр: За, таны нэрийг хэн гэдэг вэ?
Омар Матин: Би Исламын улсын нэрийн өмнөөс бурханыг хамгаалах болно. /арабаар/ Бакар аль Багдадид үнэнч байхаа андгайлж байна.
Цагдаагийн газрын жижүүр: За, за таныг ойлголоо. Та хаана байна вэ?
Омар Матин: Би Орландо хотод байна.
Цагдаагийн газрын жижүүр: Орландогийн яг хаана байна.
Омар Матин /Утсаа залгав/.
Орландогийн халдлага болохоос цагийн өмнө Матин ийнхүү цагдаагийн газар руу залгажээ. Тэрээр уг дуудлагаас хагас цагийн дараа дахин Орландогийн цагдаагийн газартай холбогдсон байна.
Орландогийн халдлагын улмаас 49 хүн амиа алдаж, 200 гаруй хүн шархтсан билээ. Цагдаагийнхан уг халдлагатай холбогдуулан түүний эхнэрийг баривчлаад байгаа юм.
Б.Дэлгэрцэцэг
Уншиж байна |