МАН-ын нөлөө бүхий лидерүүдийн сонгуульд яаж мөнгө босгож оролцох, дараа нь албан тушаалыг хэрхэн наймаалцах талаар хоорондоо ярьсан авлигын баримт  ил боллоо. МАН-ын дарга М.Энхболд, Нийслэлийн МАН-ын хорооны дарга Ц.Сандуй болон түүний ойрын хүн А.Ганбаатар нарын 60 тэрбум төгрөг босгох тухай тохироо хийж  буй  баримтыг МАХН-ын сонгуулийн штабын ерөнхий менежер Э.Эрдэнэжамъян олон нийт, хэвлэл мэдээллийнхэнд өгөх нь зүйтэй гэж үзсэн байна. Хэвлэлийн хүрээлэнд хийсэн хэвлэлийн хурлын үеэр тэрээр хэлэхдээ, “МАН сонгуулийн зардлаа хэтрүүлсэн байна. 60 тэрбум төгрөг гэдэг бол сонгуулийн зардлыг арав дахин нэмэгдүүлсэн өртөг, түүнийгээ зөвхөн нийслэлээс гаргана гэж ярьж байна.  МАН-ынхан  бид сонгуульд ялна гэж бусдыг сүрдүүлж, өөрсдөө ч итгэлтэй ярьж байсан. Гэтэл албан тушаалын наймаа хийж, сүлжээ хийдэг хүмүүс юм байна. Авлига, мафийн ийм сүлжээг тасалъя. Үүнийг хууль, хяналтын байгууллагууд судалж мэдээлэх байх гэж үзэж байна” гэлээ.

Ч.ЗОТОЛ  

Эх сурвалж: Polit.mn