Сонгуулийн ерөнхий хорооноос мэдээлэл хийхдээ МАХН-аас нэр дэвшигч Оюунсайханыг нэр дэвшигчийн жагсаалтаас хассан тухайгаа мэдэгдсэн. Тэрбээр сурталчилгааны материалдаа шашны холбогдолтой зураг нийтэлсэн нь хууль зөрчсөн хэмээн шүүхээс тогтоожээ. Нэр дэвшигч торгуулийн мөнгөө төлж, давж заалдахгүй хэмээн Сонгуулийн ерөнхий хороонд мэдэгдсэн учраас нэрсийн жагсаалтаас хассаныг Ч.Содномцэрэн ярьсан юм.
Тэгвэл энэ асуудлаар МАХН-ын дарга Н.Энхбаяр, 28 дугаар тойрогт нэр дэвшигч Оюунсайхан нарын хүмүүс мэдээлэл хийлээ.
Оюунсайхан “Сонгуулийн ерөнхий хорооноос надад мэдэгдэлгүйгээр миний нэрийг татлаа. Би лам багш нартайгаа авахуулсан зургаа сурталчилгааны материалдаа тавьсан. Энэ талаар МАН-ын ухуулагч өргөдөл гаргаж, шүүхээс намайг торгосон. Нэг хүнд хоёр арга хэмжээ авдаггүй гэж би ойлгосон. Би МАН-ын дарга М.Энхболд нартай өрсөлдөж байгаа. Шударга өрсөлдмөөр байна. Шударга нийгэмд амьдармаар байна. Би Монголын төрийг шударга байлгын төлөө ямагт зогсоно” хэмээн хэлэв.
Харин энэ талаар МАХН-ын дарга Н.Энхбаяр “Сонгуулийн хуулинд шашны зан үйлийг хориглодог. Харин Оюунсайханы энэ зураг зан үйл биш. Энэ жижигхэн зураг нэр дэвшигчийг татах үндэслэл болохгүй. Гэтэл МАН-ын даргын захиалгаар ухуулагч нь шүүхэд хандсан. Харин захиргааны хэргийн шүүх нь үүнийг мушгин гуйвуулж, шашны зан үйл болгож, торгосон байгаа юм. Тэгээд хэдэн төгрөг төлчихсөн байтал яг өнөөдөр сонгууль болж байгаа энэ үед Сонгуулийн ерөнхий хорооноос нэрийг нь татлаа. Нэг үйлдлээр хоёр арга хэмжээ авч болохгүй. Сонгогчдоосоо тэгж их айгаад байгаа юм уу. Сонгууль эхлээд долоон цаг болж байхад татаж байна. Татах байсан бол өчигдөр татахгүй яасан юм. МАН-ын дарга М.Энхболдын өрсөлдөж байгаа тойрог дээрх энэ үйлдэл тухайн сонгуулийг дахиулахаас өөр аргагүй байдалд хүргэж байна. Сонгуулийн ерөнхий хороо ийм гоомой, хууль бус шийдвэр гаргасандаа хариуцлага хүлээж цуцлах хэрэгтэй. Бас сонгуулийг дахиулах хэрэгтэй. Ийм байдлаар сонгогчдыг төөрөгдүүлсэн хүмүүс хариуцлага хүлээх ёстой” хэмээн ярив.
В.Бат
Уншиж байна |