Хил хамгаалах ерөнхий газрын удирдлага, хамт олон “Рио-2016” олимпийн наадамд оролцох “Хилчин спорт хороо”-ны тамирчдаа хүлээн авч уулзаж хүндэтгэл үзүүүлэв. Энэ үеэр Чөлөөт бөхийн эмэгтэйчүүдийн шигшээ багийн тамирчин, ДАШТ-ий мөнгөн медальт, ОУХМ Э.Сумъяагаас дараах тодруулгыг авлаа.
-Олимпийн эрхийг тань сэргээхээр болжээ?
-Энэ талаар холбооныхон мэдэгдэл хийх байх. Одоохондоо би сайн мэдэхгүй байна. Ямартай ч дэлхийн нэгдсэн бөхийн холбоо, Дэлхийн допингийн эсрэг агентлагаас олимпийн эрхийг сэргээхээр болсон гэсэн. Гэхдээ энэ тухай албан ёсны хариу хараахан гараагүй байгаа.
-Таныг сэргээш хэрэглэсэн үгүй гээд л олон зүйл яригдаж байна. Та үүнд тайлбар өгөх үү?
-Мелдониум гэдэг бодис нь хүний биеийн онцлогоос болж элгэнд нэлээн олон грамм хуримтлагддаг. Ерөнхийдөө энэ бол допин хэрэглэсэн гэсэн асуудал биш. Тамирчид ерөнхийдөө уух ёстой зүрхний үйл ажиллагааг дэмждэг эм. Тэрнээс биш сэргээш хэрэглэсэн асуудал бол байхгүй.
-Мелдониумыг энэ жилээс сэргээшийн төрөлд хамааруулах болсон гэсэн үү?
-Тийм ээ. Өнгөрсөн дөрөвдүгээр сарын 13-нд албан ёсоор мэдээлж уг бодисыг сэргээшийн төрөлд хамааруулан үзэх болсон. Асуудал дагуулаад байгаа энэ бодис нь зүрх болон тархины цусан хангамжийн дутагдал, биеийн хүчний болон оюун ухааны хэт ачаалал даах чадварыг нэмэгдүүлэх мөн тархины гэмтэл, хагалгааны дараах нөхөн сэргэлтийг дэмжих зориулалттай эм.
-Олимпийн эрхээ хураалгаад ихэд харамссан болов уу?
-Эхлээд сонсоход харамсалтай байсан. Гэхдээ өөр олон тамирчнаас илэрч, олон хүн эрхээ хасуулсан учраас нэг их сэтгэлээр унасан зүйл бол байгаагүй.
-Нийт хичнээн тамирчин эрхээ хасуулсан бэ?
-Өнгөрсөн нэгдүгээр сарын 1-нээс гуравдугаар сарын 1 хүртэл 50 орны 172 тамирчнаас мельдониум илэрсэн гэсэн.
-Эрхгүй болоод байх хугацаандаа бэлтгэлээ хийж байсан уу?
-Бэлтгэлээ тасалдуулаагүй. Одоогоор бэлтгэл сургуулилтаа хийх ёстой хэмжээндээ хийж яваа. Сайн байгаа.
Г.Тэгшсүрэн
Уншиж байна |