Өнгөрсөн шөнө боксын төрлийн эрэгтэйчүүдийн 60 кг-ийн жинд мөнгөн медалийн төлөө манай тамирчин Д.Отгондалай Францын боксчин Софьян Үмиятай тулалдсан. Улмаар Францын боксчинд 29:28 харьцаагаар ялагдаж, "Рио 2016" олимпийн наадмаас хүрэл медаль хүртлээ.
Д.Отгондалай шүүлтэд сэтгэл дундуур буйгаа илэрхийлж "Монголын ард түмэн намайг яаж тоглосныг харсан байх аа" хэмээн уйлж байсан тухай манай улсаас Бразил улсад байрлан ажиллаж буй сэтгүүлч мэдээлсэн. Олон нийт ч түүнтэй санал нэг буйгаа илэрхийлж, тулааныг буруу шүүсэн гэж үзэж байна.
Д.Отгондалай тоглолтын эхнээс илүүрхэж гурван үеийн турш илт давуу байсан ч эцсийн мөчид францын боксчин 29:28 оноогоор ялалт байгуулсан. Манай боксчин гурван үеийн турш ажилласан бол франц тамирчин сүүлчийн раундад ядарсан нь илт харагдаж байв. Гэвч түүнд ялалт өгсөн нь шударга шүүлт биш хэмээн олон нийт дургүйцлээ илэрхийлжээ.
Д.Отгондалай, Софьян Үмия нарын тулааныг "Бээжин 2008" олимпийн наадмын алтан медальт боксчин, МУГТ Э.Бадар-Ууган, мөнгөн медальт боксчин МУГТ П.Сэрдамба нар хэрхэн дүгнэснийг сонирхуулж байна.
Г.Тэгшсүрэн