УИХ дахь МАН-ын бүлгийн хуралдаан өндөрлөлөө. Засгийн газраас энэ оны төсөвт тодотгол хийхээр хуулийн төсөл өргөн бариад байгаа. Бүлгийн хуралдаанаар энэ оны төсвийн тодотголыг тойрсон асуудлыг хэлэлцсэн байна. Тус намын бүлэг төрийн албан хаагчдын цалинг бууруулахгүй байх шийдэлд хүрээд байсан. Харин бүлгийн өнөөдрийн хуралдаанаар зарим асуудлаар гишүүд тодорхой шийдэлд хүрсэн байна. Энэ тус бүлгийн дарга Д.Хаянхярваа мэдээлэл хийв. Тэрбээр мэдээлэлдээ:
-Архи, тамхины онцгой албан татварыг нэмэгдүүлэх талаар санал нэгдлээ. Хос хөдөлгүүр автомашины онцгой албан татварыг нэмэгдүүлэхгүй байхаар шийдлээ. Нийгмийн даатгалын хуульд өөрчлөлт оруулахыг энэ удаад хойшлуулаад байна. Улсын төсвөөс болон төсвийн эргэн төлөгдөх нөхцөлтэйгөөр оруулсан хөрөнгө оруулалтыг дотор нь хэд хэд ангиллаа. Төсөвт өртөг нь нэмэгдсэн объектуудын нэмэгдсэн хөрөнгийг олгохгүй байхаар шийдсэн. Мөн өнгөрсөн онд төлөвлөгдсөн хэмжээнээсээ санхүүжилт нь нэмэгдсэн объектуудын хөрөнгийг олгохгүй. Харин шинээр нэмэгдэгдсэн объектуудыг энэ оны төсвийн тодотголоос хасахаар боллоо. ХАОАТ-ын талаар Засгийн газраас оруулж ирсэн төсөл хэвээрээ үлдсэн. Оюутны тэтгэлэгтэй холбоотой 90 тэрбум төгрөгийн тэтгэлгийн сангийн бонд байгуулна. Энэ бондоос сургалтын төлбөрийн тэтгэлэг авах замаар шийдвэрлэнэ. Хүүхдийн мөнгийг 60 хувь болох зорилтот бүлэгтээ олгоно. 40 хувьд нь ногдох мөнгийг 3 жилийн хугацаанд хуримтлал үүсгэж байгаад олгохоор хэлэлцлээ. Төсвийн тэнцэл ганц хоёр функтээр буурна гэлээ.
Мөн МАН-ын бүлгийн хаалттай хуралдааны талаарх мэдээлэл “Ардын эрх” сонины өнөөдрийн дугаарт нийтлэгдсэн. Үүнтэй холбогдуулан тэрбээр “Манай намын хаалттай хуралдааны талаарх мэдээлэл протокол хэлбэрээр “Ардын эрх” сонинд нийтлэгдсэн. Бид энэ асуудлаар тагнуулын байгууллагад хандаж байна.” хэмээв.
Тус намын бүлэг Засгийн газрын өргөн барьсан ХАОАТ-ын тухай хуулийн төслийг хэвээр үлдээснээр 2.5 сая төгрөгөөс дээш цалинтай иргэдийн татварыг нэмэгдүүлж, 150 ам.метрээс дээш хэмжээтэй орон сууцанд татвар тогтоож байгаа юм.
Н.Энх