Өнгөрсөн наймдугаар сарын 31-нд Англи улсын иргэн  Стивен Нэйш гэх уулчин Монгол улсын нутаг дэвсгэрт амиа алдсан хэрэг гарчээ. Тэрбээр  гадны нөлөөтэй амиа алдсан байж болзошгүй талаар цагдаагийн байгууллагаас мэдээлэл хийлээ.

Уулчны цогцсыг Архангай аймгийн Хангай сумын Тэрх багийн “Хандрагт” гэх газраас нутгийн иргэн олж, цагдаад мэдэгдсэн байна. Цагдаагийн байгууллагад хэргийн талаар мэдээлэл энэ сарын 1-ний 02.40 цагт бүртгэгджээ. Улмаар тус хэргийг аймгийн цагдаагийн газар болон Мөрдөн байцаах газрын онц хүнд гэмт хэрэг мөрдөх хэлтсээс хамтарсан ажлын хэсэг Архангай аймагт шалгалтын ажлыг явуулж байгаа юм байна. Одоогоор тус хэрэгт хоёр иргэнийг сэжигтнээр саатуулан шалгаж байгаа аж. Урьдчилсан дүгнэлтээр гадны нөлөөтэй байж болзошгүй шинж, тэмдэг илэрч байгаа тухай албаныхан мэдээллээ.

Цагдаагийн байгууллагаас “Мөрдөн байцаалтын ажил явагдаж байгаа учраас илүү дэлгэрэнгүй мэдээлэл өгөх боломжгүй. Гадаад иргэн Монгол улсад гэмт хэргийн хохирогч болох асуудал дээр цагдаагийн байгууллага анхаарч ажиллана. Гадаад иргэд ихээр зорчдог газруудад хяналт шалгалт явуулдаг” гэх мэдээллийг өгөв.

Талийгаач нь Хангай нурууны ноён оргилд гарах зорилготой Монгол Улсад өөрийн найз Гарет Астоны хамт иржээ. Гэвч түүний найзын бэртэл сэдэрсний улмаас нутаг буцахаар болж, Стивен Нейш аялалыг цааш ганцаараа үргэлжлүүлж явсан гэх мэдээлэл бий.

Стивен Нэйш нь Англи улсын иргэн бөгөөд 53 настай байжээ.

Г.Тэгшсүрэн