УИХ-ын чуулганы нэгдсэн хуралдаанаар ирэх оны улсын төсвийн төслийг дагалдах хуулийн төслүүдийг хэлэлцлээ.  Хүүхэд харах үйлчилгээний тухай хуулийг ирэх оны нэгдүгээр сарын 1-нээс хэрэгжүүлэхээр болсон. Мөн ҮХЦ-ийн дарга, прокурорын  цалинг нэмэгдүүлэхээр болж байгаа юм.  Хэлэлцэж байгаа асуудалтай холбогдуулан гишүүн О.Баасанхүү:

-Хүүхэд харах үйлчилгээний тухай хуулийг хэрэгжүүлэхээр болжээ. Тиймээс Хамтын тэтгэврийн тухай хуулийг хэрэгжүүлж болохгүй юу. Нэгэнтээ хүүхдийн асуудал хөндсөнийг цэцэрлэгийн хүүхдийн хоолны мөнгийг нэмээч ээ хэмээлээ. Үүнд Төсвийн байнгын хорооны дарга Ч.Хүрэлбаатар:

-Хүүхэд харах үйлчилгээний тухай хуулийг 2017 оны нэгдүгээр сарын 1 болгон буцаан оруулж ирж байгаа. Энэ хуулийн төсөл батлагдсан байсан учраас олон аж ахуйн нэгж бэлтгэлээ хийсэн байсан. Хамтын тэтгэврийн тухай хууль хэрэгжээд эхлээгүй байсан. Энэ хуулийн эх үүсвэр тодорхой болгоогүй байсан. ҮХЦ-ийн гишүүдийн цалинг нэмж байгаатай холбоотой онцгой нэмэгдлүүдийг нь хасч байгаа. Өмч хувьчлалын орлогоос 50 тэрбум төгрөг орно гэж тооцсон. Учир нь гадаадын хөрөнгө оруулалт гараад явсан. Тиймээс  хөрөнгө оруулалтын орчныг сайжруулж, хувийн хэвшлийг дэмжих чиглэлээр Засгийн газар үйл ажиллагаа явуулж байна. Цэцэрлэгийн хүүхдийн мөнгийг нэмж өгч болно. Эцэг эхчүүд нь өөрсдөө хариуцаад нэмэх нөхцөл байгаа.

Асуулт асууж, хариулт авсны дараагаар Хүүхэд харах үйлчилгээний тухай хуульд өөрчлөлт оруулах болон бусад хуулийн төслийг хэлэлцэхийг гишүүдийн олонхи нь дэмжив. Ийнхүү өнөөдрийн чуулганы нэгдсэн хуралдаан өндөрлөлөө. 

Н.Энх