Монголын үндэсний бөхийн холбооны /МҮБХ/-ны ээлжит бус “Их эе” хурал энэ сарын 10-ны өдөр болно. Гэвч тус холбооны тэргүүн Р.Нямдорж уг хурлыг хуралдуулахгүй тухай мэдэгдэл гаргажээ. Үүнийг эсэргүүцсэн МҮБХ-ны цэцдийн зөвлөлийн гишүүн, “Их эе” хурлын зохион байгуулах ажлын хэсгийн ахлагч Ү.Хүрэлбаатар, УИХ-ын гишүүн, Дархан аварга А.Сүхбат нарын хүмүүс мэдээлэл хийлээ.

Үндэсний бөхийн холбооны “Их эе” хурлыг  Улсын дээд шүүхээс 2003 оны гуравдугаар улиралд багтаан хуралдуулахыг үүрэг болгожээ. Гэвч бөхийн холбооноос хурлыг хийгээгүй учир Нийслэлийн шүүхийн гүйцэтгэх албанаас 2015 оны зургадугаар сард тус холбооны Цэцдийн зөвлөлийг албадан хуралдуулсан байна. Хурлаар Үндэсний бөхийн “Их эе” хурлыг энэ сард хуралдахаар болсон. Гэсэн ч МҮБХ-ны тэргүүн М.Нямдорж  өчигдөр /2016.12.06/ хуралдуулахгүй  тухай мэдэгдэл гаргасан байна.

МҮБХ-ны цэцдийн зөвлөлийн гишүүн, “Их эе” хурлын зохион байгуулах ажлын хэсгийн ахлагч Ү.Хүрэлбаатар “Ээлжит бус хурал хуралдуулах тухай Дээд шүүхийн шийдвэр гарсан байхад М.Нямдорж өөрийн ашиг сонирхлын үүднээс хуралдуулахгүй байх шийдвэр гаргаж байгаа нь хууль бус үйлдэл. Дахин хойшлуулах шалтгаан нь шүүхийн шийдвэрийг үндэслэсэн гэж мэдэгдэлдээ бичсэн байна. Харин ч дээд шүүх хуралдуулах шийдвэр гаргасан. Энэ хүн өнгөрсөн 11 жилийн турш тэргүүнээ сонгох ээлжит бус хурлыг ийм байдлаар хойшлуулсаар өдийг хүрсэн. Хариуцлага хүлээх ёстой” хэмээв.

МҮБХ-ны тэргүүн М.Нямдорж “Их эе” хурлыг хуралдуулахгүй байх мэдэгдэл гаргасан ч тус холбооны цэцдийн зөвлөлөөс энэ хурлыг зохион байгуулна гэдгээ мэдэгдлээ.  Хурлын үеэр Дархан аварга А.Сүхбат бөхчүүдийн эрх ашиг зөрчигдөж байгаа талаар өөрийн үзэл бодлоо хуваалцлаа.

А.Сүхбат: М.Нямдорж бөхийн холбоог "самарч" байна

Тэрбээр Би монголын ард түмэнд өртэй хүн гэж өөрийгөө тооцож явдаг. Монголын бөхийн спортод салшгүй 30 гаруй жил зүтгэж ирсэн. Тийм болохоор би  ирээдүй хойч, залуу үедээ аливааг хийж бүтээж өгөх өртэй хүн. М.Нямдорж гуайд хандаж хэлэхэд өнгөрсөн 26 жилийн турш МҮБХ-г хууль бусаар тэргүүлсэн. Одоо хангалттай. Хэдэн жил бөхийн холбоог "самрах" гэсэн хүн бэ. Таниар удирдуулах, ажлаа хийлгэх хүсэлтэй бөх алга. Монгол бөх цэвэр ариун байж төр ариун байх учиртай. Гэтэл өнөөдөр сумын наадмаар туранхай хүү том бөхийг унагааж байх жишээтэй. Сумын заан цолтон болоход 20 сая, аймгийн арслан болоход 50 сая төгрөг, Улсын начин болоход 500 сая гэх үнэ ханш яригддаг болжээ. Ийм байдлыг МҮБХ даамжруулж, арга хэмжээ авахгүй 26 жил явсан байна. Тиймээс энэ байдлыг засаж, ард түмэндээ шударга барилдаан үзэхийн төлөө бид тэмцэж явна. Үүнийг боогдуулж байгаа хүн нүгэлтэй шүү гэдгийг хэлмээр байна. Бид шүүхийн шийдвэрийг гүйцэлдүүлнэ. МҮБХ-ны ээлжит бус “Их эе” хурлаа хийнэ гэдгийг үүгээр мэдэгдэж байна” хэмээв.

Хуульд оролцогчид МҮБХ-ны цэцдийн зөвлөл холбооны тэргүүнийг сонгох ёстой. Гэтэл М.Нямдорж хууль бусаар тэргүүн хэмээн өөрийгөө тодорхойлж 26 жилийн турш ажиллаж ирсэн гэдгийг хэлж байв. Улмаар түүнийг ажил үүргээсээ чөлөөлөгдөх ёстойг тэд онцоллоо.

МҮБХ-ны ээлжит бус “Их эе” хурал энэ сарын 10-нд Улаанбаатар хотноо болно. Хурлаар холбооны тэргүүнийг албан ёсоор сонгох юм байна. Цэцдийн зөвлөл зарлаж буй учраас энэ нь хууль ёсны хурал гэдгийг тус зөвлөлийн гишүүд хэлж байлаа.

Монголын Үндэсний бөхийн холбооны дүрмийн дагуу “Их эе” хурлын товыг 21 аймгийн Үндэсний бөхийн холбоо, бөхийн дэвжээний тэргүүнүүдэд мэдэгдээд байгаа аж.

Г.Тэгшсүрэн