Өглөөний 09.00 цагт эхэлнэ гэж товлогдсон УИХ-ын байнгын хороодын хуралдаан үдийн 12.00 цаг болоход эхлээгүй байх нь энгийн үзэгдэл болов. Шалтгаан нь гишүүдийн ирц бүрдээгүй.
Өнөөдөр Хуульзүйн байнгын хороо дөрвөн гишүүний бүрэлдэхүүнтэй хуралдаж байна. Хуульзүйн байнгын хорооны дарга Ш.Раднаасэд, УИХ-ын гишүүн О.Батнасан, Н.Оюундарь, Л.Энхболд дөрөв хуралдаж, гэр бүлийн хүчирхийллийн эсрэг хуулийг хэлэлцэж байна. Уг нь тус байнгын хороонд 19 гишүүн багтдаг. УИХ-ын гишүүн Ж.Батзандан, Б.Бат-Эрдэнэ, Л.Болд, Д.Ганболд, Б.Дэлгэрсайхан, Л.Мөнхбаатар, Ц.Мөнх-Оргил, Х.Нямбаатар, Ц.Нямдорж, Б.Пүрэвдорж, Н.Учрал, Д.Цогтбаатар, Б.Чойжилсүрэн, С.Эрдэнэ нар хуралдааныг тасалж, хаа нэг газар “зугаалж” явна.
Мөн Эдийн засгийн байнгын хорооны хуралдаан гишүүдийн ирц хүрээгүйн улмаас хойшиллоо. Тус байнгын хорооны 19 гишүүнээс Т.Аюурсайхан, С.Чинзориг, Ж.Ганбаатар нар хуралдааны танхимд ирсэн харагдав. Байнгын хорооны дарга Д.Тэрбишдагва ч хуралдаа ирсэнгүй. Ингэснээр ипотекийн зээлийн талаарх мэдээлэл хоёртоо хойшиллоо.
Үдээс өмнө хуралдах ёстой байсан хоёр байнгын хорооны нэг нь ирцгүйн улмаас хойшилж, нөгөө нь тав, зургаахан гишүүнтэй хуралдсан нэр зүүгээд тарлаа. Үдээс хойш Хууль зүйн байнгын хороо болон Эдийн засгийн байнгын хорооны хамтарсан хуралдаанаар Хөгжлийн банкны үйл ажиллагаанд хийсэн шалгалтын талаарх ажлын хэсгийн мэдээллийг сонсох учиртай. Хөгжлийн банкны санхүүжилтийг идсэн, уусан гэж биен рүүгээ дайрч, чичлэх энэ хуралдаанд АН, МАН-ынхан ирж болзошгүй. Харин 14.00 цагаас эхлэх Төрийн байгуулалтын байнгын хороо хуралдаан үдээс өмнөх байдлаар бол мөн л хуралдахгүй болов уу.
МАН-ынхан өчигдөр VII бага хурлаа хийж, намын генсекээ жинхэлсэн. Магадгүй шинэ генсекийн баяраа тэмдэглэж найрлаад, өнөөдрийн төрийн ажлыг мартсан байж болох. Ямартай ч сүүлийн үед УИХ-ын чуулган, байнгын хороодын хуралдаан байнгын “сохор, доголон” ирцтэй байгаа. Ирэхээсээ ирэхгүй нь олон гишүүд ч цөөнгүй. Гишүүдийн гол үүрэг, ажил нь парламентын танхимд сууж хууль хэлэлцэн, батлах. Харин энэ ажлаа хийдэггүй хүмүүст хэн хариуцлага тооцох ёстой юм бэ.
В.Бат