Цагдаагийн байгууллагаас Улаанбаатар хотод үйлдэгдэж буй халаасны хулгайн гэмт хэрэгтэй тэмцэх, таслан зогсоох зорилгоор “Үнэгний ав” нэртэй тусгайлсан ажиллагааны үеэр гэмт хэргийн замаар алдагдсан 47 гар утсыг олж, эзэнд нь хүлээлгэн өгсөн байна.
Одоогоор хохирогч нь тогтоогдоогүй “Ipone 5”, “Samsung S5” зэрэг маркийн 12 гар утас Улаанбаатар хотын Цагдаагийн газрын Халаасны хулгайн гэмт хэрэгтэй тэмцэх хэлтэст хадгалагдаж буй аж. Иймд гар утсаа алдсан иргэдийг цагдаагийн байгууллагад хандахыг албаны хүн зөвлөж байна.
Гар утас хулгайлдаг бүлэг этгээдийг шалгах явцад хулгайн гар утсыг худалдан авч, зарж борлуулдаг ченжүүдэд Эрүүгийн хуулийн 145.2-т заасны дагуу зохих хариуцлага хүлээлгэнэ гэдгийг албаныхан хэлж байна.
Иргэд гар утсаа алдсан даруйдаа цагдаагийн байгууллагад хандсанаар хохирогчийн гомдлын дагуу хэргийг цаг алдалгүй шалгах нөхцөл бүрддэг байна. Тодорхой цаг хугацааны дараа мэдэгдвэл гар утас дамжин зарагдаж, хэрэг мөрдөлт удааширдаг аж. Иймд утсаа алдсан даруйдаа цагдаагийн байгууллагад хандахыг Улаанбаатар хотын Цагдаагийн газрын Халаасны хулгайн гэмт хэрэгтэй тэмцэх хэлтсийн дарга, цагдаагийн дэд хурандаа Э.Бат-Эрдэнэ хэллээ.
Г.Тэгшсүрэн