НИТХ-ын МАН-ын бүлгээс агаарын бохирдлыг бууруулах ажлын хэсгийг байгуулжээ. Энэхүү ажлын хэсгийн гурав дахь хуралдаан өнөөдөр НЗДТГ-т нээлттэй явагдлаа. Ажлын хэсгээс дараах санал, дүгнэлтийг гаргажээ. Үүнд:

• Нийслэл хотод шилжин ирэгсдийн хөдөлгөөнийг түр хугацаагаар хязгаарлах

•  Шинэ суурьшлын бүсэд яндантай байхыг хязгаарлах

•  Үйлчилгээний байгууллагууд хог, хаягдал түлсэн эсэхэд хяналт тавих,

• Сургууль цэцэрлэгийн дотоод агаарын чанарыг сайжруулах

• Цахилгаанаар халдаг, халаалтын системийг иж бүрэн болгох үзэсгэлэн худалдааг дүүрэг, хороодод зохион байгуулах

• Шөнийн цахилгааны тарифыг тэглэх болсонтой холбогдуулан шөнийн цахилгаан хэрэглэх боломжтой, дүүрэг, хороо, гудамжыг тодорхой болгон зарлах гэх мэтчилэн зүйл заалт бүхий санал, дүгнэлтийг нэгтгэсэн байна.

Нийслэлийн төсвөөс 2017 онд агаарын бохирдлыг бууруулах ажилд нийт 3.2 тэрбум төгрөг зарцуулах юм байна. МАН-ын бүлгээс байгуулсан ажлын хэсгээс энэ жил утааг огцом бууруулах боломжгүй. Утааг бууруулах чиглэлээр шат дараатай олон арга хэмжээ авч ажиллах бодлого тодорхойлоод байгааг хэлэв.  

Эхний ээлжинд Улаанбаатар хот руу шилжин ирэгсдийн хөдөлгөөнийг хязгаарлахгүй бол зөвшөөрөл олгох газар хомс болсон талаар мэргэжилтнүүд хэлж байна. Энэ талаар нийслэлийн Засаг даргын орлогч  Ж.Батбаясгалан “Гэр хорооллын газарт гэр нэмэгдэнэ гэдэг нь яндан нэмэгдэнэ  гэсэн үг. Улмаар утаа нэмэгдэхээс гадна ариун цэврийн байгууламж буюу нэгдсэн системд холбогдоогүй учраас бохирдлоо шууд газарт шингээнэ. Тийм учраас шилжин ирэгсдийн хязгаарлалтын асуудал нэн чухал байна. Үүнд агаарын бохирдлыг бууруулах ажлын хэсгээс УИХ, Засгийн газар, Үндэсний аюулгүй байдлын зөвлөлөөс дэмжлэг авахаар санал гаргаж байгаа” гэв.

Шинэ суурьшлын бүсэд шилжин ирэх гэж буй айл өрх, зуух галлахаас өөр байдлаар халаалтаа шийдсэн тохиолдолд зөвшөөрөл олгох нь зөв гэдгийг ажлын хэсгийнхэн онцолж байлаа.

Ажлын хэсгээс баримталж буй дараагийн нэг бодлого нь улаан шугам татах аж.  Улаан шугаманд зөвшөөрөлтэй нутаг дэвсгэрт буусан айл өрхүүд багтах юм байна. Хязгаарлалтын бүсээс гадуур буусан айл өрхүүдэд төрийн үйлчилгээ үзүүлэх боломжгүй байгаа тул улаан шугаман доторх айлуудад  үйлчилгээг хүргэх нь зүйтэй гэж мэргэжилтнүүд үзжээ.

Мөн Засгийн газраас гаргасан шийдвэрийн дагуу цахилгааны шөнийн тарифын хөнгөлөлтийг аль бүсэд хэрэгжүүлэх, түүхий нүүрсийг хаана түлэх вэ зэргийг тогтоож өгөх нь зүйтэй гэдгийг хэлж байна.

Энэ талаар Нийслэлийн агаарын бохирдлыг бууруулах газрын дарга М.Дэлгэрэх “Нийслэлийн  11 харуулын станцуудаар хүлээн авсан мэдээгээр утаа хуримтлагддаг бүс харьцангуй өөр үзүүлэлттэй байна. Тухайлбал Баянбүрдийн тойрог буюу Чингэлтэй дүүрэг орчим болон Баянхошуу орчимд агаарын бохирдол хамгийн өндөр үзүүлэлттэй байна. Энэхүү бүсүүдийг тогтоож, бохирдол өндөртэй байгаа хэсэгт технологи нэвтрүүлэх нь зүйтэй байгаа юм” хэмээв.

НИТХ-ын МАН-ын бүлгийн агаарын бохирдлыг бууруулах ажлын хэсгээс дээрхи үндсэн гурван бодлогын хүрээнд ажиллаж байгаа юм байна.

Г.Тэгшсүрэн