АНУ-ын 45 дахь Ерөнхийлөгч Дональд Трамп өчигдөр “Транс-Номхон далайн Түншлэлийн гэрээ”-нээс /TPP/ татгалзах шийдвэрт гарын үсэг зурсан талаар Цагаан ордны хэвлэлийн албанаас мэдээлэв. Трамп Цагаан ордны зуйван танхимдаа албаныхан болон хэвлэлийнхний өмнө уг шийдвэрт гарын үсэг зурсан байна.

Тэрбээр Ерөнхийлөгчийн сонгуульд өрсөлдөж байхдаа “Хэрвээ би сонгуульд ялалт байгуулж, энэ улсыг тэргүүлэх бол хамгийн эхэнд АНУ-д ямар ч хэрэггүй “Транс-Номхон далайн Түншлэлийн гэрээ”-нээс татгалзах болно. АНУ хэтэрхий их мөнгийг хэрэггүй зүйлд зарцуулж байна” хэмээн мэдэгдсэн билээ.

Ийнхүү Трамп сонгогчдоо амласан зүйлсүүдээ эхнээс нь биелүүлж эхлэв. “Би амласан бол биелүүлдэг. Би шударга бас зарчимч” хэмээн Трамп мэдэгджээ. Өмнөх Ерөнхийлөгч Барак Обама 12 улсыг хамарсан худалдааны гэрээ буюу “Транс-Номхон далайн Түншлэлийн гэрээ”-ний тусламжтай Азийн орнуудыг хяналтадаа байлгадаг байсан юм. Уг тушаалд гарын үсэг зурсаныхаа дараа Трамп “Миний болон бидний хийсэн зүйл Америкийн олон ажилчдын хувьд сайн зүйл боллоо. Ард түмнийхээ нуруун дээр дарамт учруулж бүхнийг цуцалж, илүү сайнаар солих болно” гэж мэдэгджээ.

Б.Дэлгэрцэцэг