Хууль зүйн байнгын хороо хуралдлаа. Хуралдаанаар “Эрдэнэт үйлдвэр” дэх “Монгол зэс” корпорацийн эзэмшлийн 49 хувьд хийсэн шалгалтын дүнг үргэлжлүүлэн хэлэлцэв.
Өнгөрсөн долоо хоногт уг асуудлыг хэлэлцэх үед УИХ дахь АН-ын бүлгээс ажлын тав хоногийн завсарлага авсан. Завсарлагын хугацаа өнөөдөр дуусч байгаа юм. Ажлын хэсгийн зүгээс “Эрдэнэт үйлдвэр”-ийн 49 хувийг төрийн мэдэлд авах нь зөв гэсэн дүгнэлт гаргажээ. Үндсэн хуульд "УИХ олон улсын гэрээг соёрхон батлах, цуцлах асуудлыг бүрэн эрхийнхээ хүрээнд шийдвэрлэнэ" гэж заасан байна. Компанийн тухай хуулийн “Төрийн өмчит компанийн өмчлөгч нь төрийг төлөөлж УИХ байна” гэсэн заалт бий. Тиймээс дээрх компаниудын 49 хувийг худалдахдаа УИХ-аар хэлэлцүүлээгүй тул хууль тогтоох дээд байгууллагын бүрэн эрхийг зөрчсөн хэмээн үзсэн байгаа юм. Хэлэлцэж байгаа асуудалтай холбогдуулан гишүүд асуулт тавьж, байр сууриа илэрхийлэв.
УИХ-ын гишүүн С.Эрдэнэ:
-"Эрдэнэт"-ийн 49 хувийг эргүүлж авахаар ярилцаж байгаа нь төр хувийн хэвшлийн өмчид халдсан үйлдэл. Тиймээс энэ асуудлыг хэлэлцэхдээ эзэмшигч талынх нь төлөөллийг оролцуулах хэрэгтэй. Иргэн, хуулийн этгээдийн буруутай эсэхийг шүүхийн байгууллага тогтоодог. УИХ шүүхийн өмнүүр орж асуудалд хандах ёсгүй. Энэ үйлдвэрт шахааны бизнес хөгжсөн гэж ярьдаг. Тиймээс төрийн өмчийн 51 хувийг мөн шалгах хэрэгтэй.
УИХ-ын гишүүн Ц.Даваасүрэн:
-Үндсэн хуулийн дагуу төрийн өмчийг ард түмнийг төлөөлж УИХ хариуцахаар заасан. УИХ бол хууль тогтоох дээд байгууллага. Энэ байгууллага бүрэн эрхийнхээ хүрээнд төрийн өмчтэй холбоотой бүх асуудлыг шийдвэрлэх эрхтэй. Хувийн өмч хэнд ч шилжиж болно. Стратегийн ордыг төрийн эзэмшилд байлгаж, хөрш орнуудаасаа эдийн засгийн хараат бус байдлаа хангах ёстой.
УИХ-ын гишүүн Ц.Нямдорж:
-“Эрдэнэт" төрийн өмчийн 51 хувийг жичдээ ажлын хэсэг гаргаад шалгаж болно. Энэ бол УИХ-ын бүрэн эрхийн асуудал. Нэн тэргүүнд төрийн өмчийг буцааж авах ёстой.
Ийнхүү байнгын хорооны хуралдаанаар ажлын хэсгийн санал дүгнэлтэд үндэслэн “Шийдвэрийн төсөл” боловсруулж, УИХ-ын чуулганы хуралдаанаар хэлэлцүүлэхээр боллоо.
Н.Энх
Уншиж байна |