Монгол Улс “ОУВС”-аас тусламж авахаар боллоо. Энэ талаар “www.forbes.com” сайт мэдээллээ.
Монгол Улсын эрх баригчид уналтад ороод буй эдийн засгаа дахин хөл дээр нь босгохын тулд хөрш орнууд болон олон улсаас санхүүгийн тусламж хүсээд нилээн хугацааг өнгөрүүлээд байна. Тэд зээл авахын тулд бүхий л боломжоо ашигласан гэхэд болно. Тус улсын эрх баригчид өнгөрсөн наймдугаар сараас “ОУВС”-аас зээл авахаар албаныхантай хэлэлцэж эхэлсэн ч үр дүнгүй байсаар өнөөг хүрчээ.
Тэгвэл Монгол Улсад Олон улсын валютын сан /ОУВС/, олон улсын байгууллагууд болон хандивлагч орнуудаас 5.5 тэрбум ам.долларын хөнгөлттэй санхүүжилтийг тус улсын эдийн засгийг тогтворжуулах үүднээс олгохоор боллоо. Монголчууд уг хандиваар эдийн засгаа аврахаар зорьж буй юм. “ОУВС” болон Монгол Улсын Засгийн газрын төлөөлөгчид өнгөрсөн ням гаригт нийслэл Улаанбаатар хотноо хэвлэлийн хурал хийж, хөнгөлттэй зээл авах болсноо зарлалаа.
“ОУВС” гурван жилийн хугацаанд 440 сая ам.долларын зээл олгох бол БНХАУ-ын Ардын банк болон Үндэсний мөнгөн тэмдэгт солилцох своп хэлцлийн хэмжээг 15 тэрбум юань болгож нэмэгдүүлэх гэнэ. Монгол Улсыг эдийн засгийн хүндхэн байдлаас гаргахаар Азийн хөгжлийн банк, Дэлхийн банк болон Япон, Өмнөд Солонгос болон бусад хандивлагч орнууд дэмжлэг хэлбэрээр тус улсад гурван тэрбум ам.долларын санхүүжилт үзүүлэхээр болсон талаар “ОУВС”-ын төлөөлөгч мэдээллээ.
Монгол Улс далайд гарцгүй бөгөөд асар их байгалийн баялагтай орон. Уг байгалийн баялагаараа олон хөрөнгө оруулагчийг татаж, 2011-2013 онд эдийн засгийн өсөлт нь хоёр оронтой тоонд хүрсэн түүхтэй. Харин өнгөрсөн оноос тус улсад эдийн засгийн хямрал үүсч, мөн экспортын орлого буурчээ. “Дээрх тусламжаар Монгол Улс уналтад ороод буй эдийн засгаа аварна” хэмээн албаныхан үзэж байна.
Ирэх гуравдугаар сард “ОУВС”-ын Захирлуудын зөвлөлөөс албан ёсоор баталгаажуулсанаар дээрх тусламж олгогдож эхлэх гэнэ. “Монгол Улс төсвийн сахилга батыг хангах нь нэн тэргүүний чухал асуудал” хэмээн “ОУВС”-ын хөтөлбөрийг хэрэгжүүлэх ажлын хэсгийн ахлагч Коши Матай сануулав.
Монгол Улсын эдийн засгийн өнөөгийн бэрхшээл нь төсвийн сул бодлого юм. “Нийгмийн халамжийг танах бодлого барихгүй. Мөн “ОУВС” ч гэсэн бидэнтэй санал нэг байгаа. Гэхдээ эдийн засгийн тогтвортой байдлыг бий болгохын тулд тодорхой хэмжээний шат дараатай алхмуудыг хийх болно” хэмээн албаныхан өгүүллээ.
Монгол Улс азтай. Учир нь “ОУВС”-ын “Өргөтгөсөн санхүүжилтийн хөтөлбөр” буюу “Extended Fund Facility” хөтөлбөрт хамрагдсанаар Монгол Улс тус байгууллагын гол хоёр хөтөлбөрт хамрагдсан цөөхөн орнуудын нэг болж буй юм. Өнгөрсөн хугацаанд уг хөтөлбөрт олон орон хамрагдахыг хүссэн ч “ОУВС” энэ орнуудад гараа тэнийлгээгүй билээ.
Б.Дэлгэрцэцэг