АН-ын нарийн бичгийн дарга О.Магнай, нийслэлийн АН-ын дарга Э.Бат-Үүл нар мэдээлэл хийлээ. Тэд Баянзүрх дүүрэгт үүсээд буй асуудлын талаар хэвлэлийнхэнд ханджээ.
О.Магнай: Цагдаагийнхан эрх баригчдын гар хөл боллоо
Баянзүрх дүүргийн ИТХ-ын 41 суудлаас 22-ыг нь АН авч, ялалт байгуулсан. Гэвч эрх баригчид шүүхийн байгууллагыг ашиглаж, асуудлыг хагас жил хойшлууллаа. Сонгуулийн хорооноос 60, 64 гэсэн хоёр тогтоол гарсан байна. АН-ын ялсан нэр дэвшигчдийг нэрсийн жагсаалтаас хасах, нөгөө нь дахин сонгууль зарлах тухай. Энэ хоёр тогтоол гурван шатны захиргааны хэргийн шүүхээр орж, хуулинд нийцэхгүй гэж хүчингүй болгосон. Тэгэнгүүт сонгуулийн тойргийн хороо тогтоолоо хүчингүй болгоод тэр өдрөө дахиад 11, 12 гэсэн утгатай нэгтэй тогтоол гаргасан байгаа юм. Тэр тогтоолоо үндэслээд хотын дарга С.Батболд шинэ Засаг даргыг батламжилсан. Энэ бол бүхэлдээ хуульд нийцээгүй үйл явц.
Баянзүрх дүүрэгт цагдаа нарын гаргасан үйлдэлд АН зайлшгүй дүгнэлт хийх ёстой. Тухайн үед ажилласан цагдаа нарт нэр, дугаар байгаагүй. Цагдаагийнхан эрх баригчдын гар хөл болсон гэж дүгнэж болно. Үүнтэй холбогдуулан АН-ын хуулийн газраас ЦЕГ-ын дарга, Улсын Ерөнхий прокурор нарт тайлбар хүссэн гомдол хүргүүлж байгаа. АН цагдаа нарыг ардчилсан хэм хэмжээг давсан, балмад үйлдэл гаргасан гэж үзэж байна.
АН иргэдийнхээ Үндсэн хуулиар баталгаажсан эрхийг хамгаална. Тиймээс МАН-ын үйлдлийг ардчилсан хэм хэмжээнээс давсан хүчирхийлэл гэж үзэж байна.
Э.Бат-Үүл: Ард түмний эрх мэдлийг хүчээр булаах гэж оролдлоо
Би АН-ын удирдлагуудын нэгийн хувьд байдал ямар ноцтой байгааг олон түмэнд сонордуулах гэж ирээд байна. Баянзүрхэд болж буй шиг үйл явдал орон даяар болж байна. Ард түмний сонголтоор бий болсон засгийн эрх мэдлийг хүч түрэн булааж авах үйл ажиллагаа явж байна. Орон нутгийн сонгуулиар АН 104 суманд ялалт байгуулсан. Таван сар өнгөрч байхад 74 сумын Засаг даргыг батламжлахгүй байна.
Ард түмэнд байгаа эрх мэдлийг хүчээр булаах гэж оролдлоо. Бүр ноцтой нь шүүх эрх мэдэл рүү халдаж байна. Хууль ёсны дээр улс төрийн дур зорго гарч байна. Үүн дээр манай ард түмэн сонор сэрэмжтэй байх хэрэгтэй. Ард түмэн сонголтоо хийсэн байхад булааж авах эрх хэнд ч байхгүй. Энэ бол Үндсэн хуулиар хориотой зүйл. Засаг захиргааны эрх мэдлийг хууль бусаар авч байхад цагдаагийн байгууллага дэмжлэг үзүүлээд явж байна. Тиймээс бид бүх шатны хуулийн байгууллагад хандана. Үндсэн хуулиа хамгаалж тэмцэнэ. Үндсэн хуулийн үнэт зүйл нурах юм бол энэ хууль хэнд ч хэрэггүй зүйл болно. Үндсэн хуулиар байгуулсан улс нуран унана. Тиймээс бид улс орныхоо төлөө тэмцэнэ.
В.Бат