АН-ын дотоод сонгууүлийн санал хураалт явагдаж байна. АН-ын 150 мянга гаруй гишүүд саналаа өгөх эрх үүсгэсэн. АН-ын дарга С.Эрдэнэ саналаа өгсний дараагаар сэтгүүлчдийн сонирхсон асуултад хариулсан юм.
-Энэ удаагийн АН-ын дотоод сонгуулийг таны зүгээс үүнийг хэрхэн харж байна вэ?
-Дотоод сонгууль бол АН-ын шинэчлэлийн чухал алхам. Анх удаа АН-ын бүх гишүүд анхан, дунд шатны намын удирдлага, удирдах бүрэлдэхүүнээ сонгож байна. АН-ын 152,800 саналын эрхтэй гишүүний саналаар 17,800 орчим анхан, дунд шатны удирдлага, удирдах бүрэлдэхүүнээ сонгож байна. Үүнийг АН төдийгүй Монголын улс төрийн түүхэнд байгаагүй томоохон өөрчлөлт, шинэчлэлт гэж харж байгаа.
-АН-ын дээд бүрэлдэхүүнийг гишүүдийн саналаар сонгохын ач холбогдлыг та хэрхэн үнэлж байна вэ?
-Өмнө нь гишүүдийн оролцоо байхгүйтэй адил. Цөөн тооны хүмүүсийн хүрээнд асуудлыг шийддэг байсан. Одоо бол гишүүдийн оролцоо дээд зэрэгт хүрсэн. Мөн АН бодлогын нам, институци болж өөрчлөгдөж байна. Үүгээрээ бусад улс төрийн намуудад өндөр босго, сайн жишиг тогтоож өглөө. Санхүүгийн хувьд ч нээлттэй ил тод болж байна. Өмнө нь дэнчин хураамж, хандив татвар бүгд нууц байсан. Хэн нь хэндээ хэдийг өгөөд байгаа ч мэдэгдэхгүй. Тийм л байсан. Өнөөдөр намын бүх шатны сонгуульд нэр дэвшиж байгаа гишүүдийн дэнчин, хураамж, гишүүдийн татвар намын дансанд төвлөрч байгаа. Өөрөөр хэлбэл, бүх орлого зарлага гишүүдэд төдийгүй олон нийтэд нээлттэй болсон. Өөрөөр хэлбэл, АН бодлогын түвшинд шинэчлэгдэж, санхүүгийн хувьд шилэн болж байна. Үр дүнд нь нам, намын гишүүд цөөн тооны олигархи хөрөнгөтнүүдээс салж, тэднээс хараат байдлаас гарч чадлаа. Энэ бол маш том ололт гэж харж байна. Түүнчлэн санхүүгийн эрх чөлөөтэй байна гэдэг ардчиллыг бүрэн утгаар нь хэрэгжүүлэх боломжоор хангагдлаа гэсэн үг.
-АН-ын шинэчлэлийн дараагийн алхам юу бол?
-Их хурлаас гаргасан шийдвэрүүд амьдрал дээр ажил хэрэг болоод явж байна. Өөрөөр хэлбэл, өмнөх шиг хоосон тунхаг болж цаасан дээр үлдсэнгүй. Үр дүнгийг нь ч гишүүд мэдэрч эхэлж байгаагаа ярьж, хэлж байна. Одоо бид үзэл баримтлал, онолоо эцэслэн боловсруулж дуусахын зэрэгцээ, санхүү, материалаг баазаа бэхжүүлэхийг зорих болно. Мөн бодлогын шинэчлэлүүдээ ч үргэлжлүүлнэ. Үүнээс нэг алхам ч ухрахгүй.
-АН-д хийж байгаа шинэчлэлийн алхмууд тань гишүүдээсээ хэр дэмжлэг хүлээж байна вэ?
-“Гишүүдийн оролцоотой нам байна” гэдэг томъёолол нь өөрөө намын шинэчлэлийн гол зорилго, амин сүнс нь. Өмнө нь гишүүдийн оролцоо байхгүй цөөн тооны бүлэг фракцууд хоорондоо тохиролцоод асуудлыг шийддэг байсан. Өнөөдрийн энэ сонгуулиар АН “Амьд нам” болж байна. Гишүүдийнхээ оролцоотойгоор, гишүүдийнхээ сонголтоор, тэдний шийдвэрээр өнөөдрийн энэ үйл ажиллагаа явагдаж байна. Би сая хоёр гурван дүүргээр орж дотоод сонгуулийн үйл явцтай танилцлаа. Гишүүд маш идэвхитэй байна. Дараалал ч ихтэй байлаа. Энэ юуг харуулж байна гэхээр гишүүд өөрсдөө энэ намынхааа үйл ажиллагаанд, шийдвэр гаргах түвшинд оролцох сонирхол асар өндөр байна гэсэн үг. Энэ л таны асуултад өгөх бодитой хариулт болж байна.