УИХ-ын чуулганы нэгдсэн хуралдаанаар энэ оны улсын төсвийн тодотголыг хэлэлцэж байна. Төсвийн тодотголтой холбогдуулан ихэнх гишүүд хүүхдийн мөнгийг зорилтот бүлэгт олгох, тэтгэврийн насыг нэмэгдүүлэх асуудлаар тайлбар авч байлаа.
Гишүүн Ц.Цогзолмаа “Иргэд ОУВС-гийн хөтөлбөрт хамрагдахыг дэмжиж байгаа. Хамгийн гол нь татварыг хэрхэн нэмэгдүүлэх талаар иргэдэд тайлбар, ойлгол өгөх хэрэгтэй байна. Цаашид татварын бааз суурийг хэрхэн нэмэгдүүлэх талаар судалсан уу. Гадаадын улс орнууд 30-50 хүртэл хувийн татвартай. Бид татвар нэмэхгүй гэдэг ойлголтоос бага багаар салж, татвараа өргөтгөх баазыг нэмэгдүүлэх шаардлагатай” хэмээлээ.
Татварыг нэмж, иргэд, аж ахуйн нэгжийн нуруун дээрх ачааг нэмж, өөрсдийн төсвөө нэмэгдүүлэн, энэ оны төсвийг дордуулж оруулж ирлээ гэх шүүмжлэлийг өнөөдрийн хэлэлцүүлгийн үеэр сөрөг хүчний гишүүдээс сонсож, зэмлүүлж суусан Сангийн сайдын магнай энэ удаад бага ч гэсэн тэнийв бололтой. Тэрбээр “Татвар бага байгааг ойлгож байна. Гадаадын улс орнууд онцгой албан татвараас ДНБ-нийхээ 8 хүртэл хувийг бүрдүүлдэг. Манай онцгой албан татвар ДНБ-ний 2 хүрэхгүй хувийг бүрдүүлдэг. Бид улс орны онцлог, нөхцөл байдалдаа тохируулж асуудлыг шийдэх ёстой гэсэн хариулт өгөв.
Гишүүн З.Нарантуяа ОУВС-гийн хөтөлбөрийг хэрэгжүүлэхдээ 3.2 тэрбум ам.долларыг юунд зарцуулах талаар асуусанд Ерөнхий сайд Ж.Эрдэнэбат:
-ОУВС-гийн хөтөлбөрт хамрагдаж, хөнгөлөлттэй зээлийг бусад улс орнуудаас авснаас 1.6 тэрбумаар нь төсвийн алдагдлыг, 1.5 тэрбумаар нь төсөл хөтөлбөрийг хэрэгжүүлж, ажлын байрыг нэмэгдүүлнэ. Засгийн газар бүх салбарыг хөгжүүлэх чиглэлд үйл ажиллагаагаа явуулна гэсэн хариулт өгсөн юм.
Чуулганы хуралдаан үргэлжилж байна.
Н.Энх
Уншиж байна |