Сирийн босогчдын хяналтад байгаа Идлиб мужийн Хан Шейхун хотноо армийнхан Ерөнхийлөгч Башар аль Ассадын тушаалаар  химийн зэвсэг ашиглаж, иргэдийг хөнөөсөн хэмээн АНУ-ын Ерөнхийлөгч Дональд Трамп мэдэгдсэн билээ. Тэрбээр Ассадад хариу барих зорилгоор Сирийн Хомс хотноо байрлах тус улсын агаарын баазыг пуужингаар харваж, устгасан юм.

Тэгвэл уг хэрэгтэй холбогдуулан ОХУ-ын Ерөнхийлөгч В.Путин өөрийн байр сууриа хүргэсэн талаар “www.dailymail.co.uk” сайт мэдээллээ.

Ерөнхийлөгч Путин “Ассадыг химийн зэвсэг ашигласан гэх нотолгоо байхгүй байна. Гэтэл барууны орнууд тэр дундаа АНУ баримт нотолгоогүйгээр Сирийн Засгийн газрыг уг хэрэгтэй холбон буруутгаж байна. Гарцаагүй нотолгоогоо олчихоод химийн зэвсгийн асуудалтай Ассадыг холбох хэрэгтэй байх” гэж мэдэгджээ.

НҮБ-ын Аюулгүй зөвлөл Сирид химийн зэвсэг туршсан эсэх асуудлаар шуурхай хуралдааныг зохион байгуулсан билээ.

Аюулгүй зөвлөл химийн зэвсэг ашигласан бүс нутагт олон улсын шинжээчидтэй Сирийн Засгийн газар хамтран ажиллахыг шаардсан тогтоол гаргасан юм. Харин уг тогтоолд ОХУ хориг тавиад байна.

Б.Дэлгэрцэцэг