Парламентад суудалтай намууд ирэх  тавдугаар сарын 2-6-ны өдрүүдэд Ерөнхийлөгчийн сонгуульд нэр дэвшигчдээ тодруулна. Одоогоор МАН, МАХН, АН-д нэр дэвших магадлалтай хүмүүсийн таамаг яригдаж байна. Үүнтэй зэрэгцээд нэр дэвшигчийн хандивын асуудал ч сөхөгдөж буй.

МАН гэхэд Ерөнхийлөгчийн сонгуульд нэр дэвшигчээсээ гурван тэрбум төгрөгийн хандив авна гэх мэдээлэл гараад буй. Тэгвэл энэ асуултад УИХ дахь МАН-ын бүлгийн дарга Д.Хаянхярваа “гурван тэрбум гэж сонсоогүй тоо байна” гэсэн хариултыг өгөв.

МАН-ын Удирдах зөвлөл хуралдаж, сонгуулийн хандив цуглуулах ажлын хэсгийг байгуулжээ. Тус ажлын хэсгийг УИХ дахь МАН-ын бүлгийн дарга Д.Хаянхярваа ахалж буй. Гэхдээ ажлын хэсэг энэ асуудлаар хуралдаагүй гэдгийг ахлагч нь хэлж байна. Мөн тэрбээр “Бид хандив цуглуулахдаа хуулийн хүрээнд ажиллана. Сонгуулийн хуулийн хүрээнд аж ахуйн нэгж, хувь хүн, иргэд рүүгээ хандаж, хандив цуглуулах ажлыг зохион байгуулна” гэв.

В.Бат