УИХ-ын чуулганы хуралдаанаар Зөрчлийн тухай хуулийн шинэчилсэн найруулгын төслийн анхны хэлэлцүүлгийг үргэлжлүүлэн хийж байна. Чуулганы хуралдааны эхэнд МАН-ын бүлэг хуралдаж, уг хуулийн төсөлд байр сууриа нэгтгэсэн. 214 хуулийг нэгтгэсэн Зөрчлийн тухай хуулийн шинэчилсэн найруулгын төсөлд ажлын хэсгээс зарчмын зөрүүтэй 80 гаруй саналыг оруулжээ. Ингэснээр Засгийн газраас өргөн барьсан төслийн агуулга өөрчлөгдөх магадлалтай гэж хууль санаачлагачид үзэж байгаа юм.
Чуулганы үдээс өмнөх хуралдаанаар уг хуулийн төсөлтэй холбоотой 17 зарчмын зөрүүтэй саналд санал хураалт явуулаад завсарлав.
Зарчмын зөрүүтэй саналаар санал хураалгах үеэр “баривчлах ял”-тай холбоотойгоор УИХ дахь АН-ын бүлгийн дарга Д.Эрдэнэбат:
-Баривчлах нь буруу юм байна гээд өчигдөр овоо ойлголцсон. Гэтэл чуулганы хуралдааны өмнө эрх баригчид хуралдаад ороод ирсэн чинь бүх зүйл өөр тийшээ яваад эхэллээ. Тиймээс чуулганы танхимд сөрөг хүчин байгаад, О.Баасанхүү, Д.Эрдэнэбат эсэргүүцэж орилоод ч хэрэг алга. Бид хариуцлага, дэг журам хэрэгтэй гэдгийг ойлгож байгаа. Гэхдээ хуулийн дарангуйлал руу буюу хүний үйлдэл болгонд ямар нэгэн торгууль, шийтгэл ногдуулж болохгүй гэдгийг анхааруулаад байхад яагаад ойлгохгүй байгаа юм. Бид Зөрчлийн хууль нэг тал руугаа дэндүү буруу явах гээд байна гэж харж байна. Тиймээс АН-ын бүлэг санал асуулгад санал өгөхгүй гэдгээ мэдэгдэж байна. Санал хураалтад оролцохгүй” хэмээгээдр УИХ дахь АН-ын бүлгийн гишүүд картаа сугалж аваад, чуулганы хуралдааныг орхин гарлаа.
Гишүүн О.Баасанхүү "Хүний биед хохирол учруулахгүй халдах гэж Зөрчлийн хуульд тусгасан байна. Хохирол учруулахгүй халдах гэж юу гэсэн үг вэ. Хүн зодох гэдгийг Эрүүгийн хуулиар шийдэх хэрэгтэй. Та нар коммунист дэглэмээр асуудлаа шийдвэл шийд. Өнөөдөр О.Баасанхүү гэдэг хүн та бүхэнд гай болоод байгаа юм биш. Та нар өөрөө өөрсдөдөө гай болоод байгаа хэмээсэнд гишүүн Ц.Нямдорж:
-Ганц хүн их эрхлэхээр тэнэг болдог юм, мэдэж ав. Дандаа хүн доромжилж байдаг хэн болчихсон юм. Чи бүр час улаан коммунист намын нэр хулгайлж авснаа мэдэж байна уу. 65 хүн рүү нэг бүрчлэн дайрдгаа боль" хэмээн уурсав.
Чуулганы хуралдааны үеэр зарчмын зөрүүтэй саналуудад гишүүд анхаарлаа хандуулж, олон талаас нь асуудлыг хөндөж байгаа юм.
Үдээс хойш 15.00 цагаас чуулган хуралдаж, Зөрчлийн хуулийн шинэчилсэн найруулгын төслийг үргэлжлүүлнэ хэлэлцэнэ.
Н.Энх