МАХН Бага чуулганаа өнөөдөр хийж,  намын дарга Н.Энхбаярыг Ерөнхийлөгчийн сонгуульд нэр дэвшүүлэхээр 100 хувийн саналаар дэмжжээ. Энэ талаар МАХН-ын гишүүн Ц.Шаравдорж, Э.Эрдэнэжамъян нар  сэтгүүлчдэд мэдээлэл хийлээ. МАХН-ынхан холбогдох бичиг баримтаа бүрдүүлж, хуульд заасан хугацаанд багтаан СЕХ-нд нэр дэвшигчийн бүртгэлийг хүргэх гэнэ.  Хэрвээ элдэв шалтаг тоочиж, бүртгэхгүй байвал эсэргүүцлийн бүхий л арга хэмжээг авах аж.  Тэд мэдээлэл хийснийхээ дараа сэтгүүлчдийн сонирхсон асуултад хариулав.

-МАХН-ын  даргыг Ерөнхийлөгчийн сонгуульд нэр дэвшигчээр бүртгэх боломжгүй гэж үзвэл дараагийн хувилбар нь хэн бэ?

Э.Эрдэнэжамъян:

-Дараагийн хувилбар гэсэн ойлголт байхгүй. МАХН-аас хүнээ нэр дэвшүүлсэн, Сонгуулийн ерөнхий хороонд бүртгүүлнэ, Ерөнхийлөгчийн сонгуульд өрсөлдүүлнэ. Яагаад гэвэл урьд, урьдных нь хууль бус шийдвэрүүд нь  дээд шатны шүүх, давж заалдах шатны шүүх дээр очоод хууль бус гэдэг нь тогтоогдож байсан. Тухайлбал, 2016 оны УИХ-ын сонгуульд ялтай гэж үзээд сонгуульд оролцуулаагүй. Энэ нь Захиргааны хэргээр явсаар эцэстээ Улсын дээд шүүхэд хүрч,  цагдаагийн байгууллага тийм шийдвэр гаргах ёсгүй байсан гэсэн шийдвэр гарсан. Монгол Улс нэг л хуультай. Нэг асуудал дээр Дээд шүүхийн шийдвэр гарсан л бол дахин нэрийн жагсаалтаас хасах ойлголт байхгүй.  Хуулийн хувьд хориг саад байхгүй болсон.

-Н.Энхбаяр даргыг Р.Амаржаргал гишүүнтэй уулзаж, түүнийг намаасаа Ерөнхийлөгчийн сонгуульд нэр дэвшүүлэх асуудлаар ярилцсан гэх мэдээлэл сошиал ертөнцөөр яригдаж байна. Энэ талаар...?

Ц.Шаравдорж:

-Тийм юм байхгүй.