Япон, Монгол улс хооронд дипломат харилцаа тогтоосны 45 жилийн ойн хүрээнд "Талын баясгалан" тоглолт зохиогдоно. Тодруулбал, 2002 онд Монгол Улс, Япон Улсын хооронд дипломат харилцаа тогтоосны 30 жилийн ой, 2006 онд Их Монгол Улс байгуулагдсаны 800 жилийн ой, 2007 онд Монгол Улс, Япон Улсын хооронд дипломат харилцаа тогтоосны 35 жилийн ой, 2012 онд Монгол Улс, Япон улсын хооронд дипломат харилцаа тогтоосны 40 жилийн ойн хүрээнд тус тус хамтарсан тоглолт зохион байгуулж байсан Япон Улсын алдарт бүжигчин, Монгол Улсын Соёлын тэргүүний ажилтан Азүма Канхо тэргүүтэй Японы язгуур урлагийн уран бүтээлчид Монгол Улсын Ардын жүжигчин, Төрийн хошой шагналт, хөгжмийн зохиолч Н.Жанцанноров, СУИС-ийн Бүжгийн урлагийн сургуулийн багш, “Улаанбаатар” чуулгын бүжиг дэглээч, бүжигчин, СТА Д.Энхгэрэл, Монгол Улсын Морин хуурын чуулгатай хамтран Монгол Улс, Япон улсын хооронд дипломат харилцаа тогтоосны 45 жилийн ойн хүрээнд зохион байгуулж байна.

Энэ удаагийн тоглолтоор хоёр улсын уран бүтээлчдийн хамтарсан бүтээл “Талын баясгалан”-г толилуулна. Морин хуурын чуулга, Японы уртын дуучин, хөгжичмид, Монгол Японы үндэсний бүжиг хосолсон энэхүү уран бүтээлээр хоёр ард түмний “найрамдал нөхөрлөл”-ийг харуулах болно. 2002 онд анх тоглосон энэхүү уран бүтээлийг бидний хамтын ажиллагааг тууштай дэмжиж, биечлэн удирдаж байсан Монгол Улсын Ардын жүжигчин, Монгол Улсын Морин хуурын чуулгын үүсгэн байгуулагч Ц.Батчулуун агсны гэгээн дурсгалд зориулж байна. Түүнчлэн Азүма Канхогийн дэглэлтээр СУИС-ийн Бүжгийн Урлагийн сургуулийн 21 оюутны оролцсон “Ёосакой Сооран”, ЕБС-ын Шинэ Монгол сургуулийн 7 сурагчдын “Сакура” Япон бүжгийн уран бүтээлийг толилуулж байна гэж Нийслэлийн соёл, урлагийн газраас мэдээллээ.