УИХ-ын чуулганы нэгдсэн хуралдаанаар Онцгой албан татварын тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийв. Монгол Улсын 2017 оны төсвийн тухай хуульд нэмэлт, өөрчлөлт оруулах тухай хуулийг дагаж батлагдсан Онцгой албан татварын тухай хуульд нэмэлт, өөрчлөлт оруулах тухай хуулиар хос тэжээлт, цахилгаан хөдөлгүүрт болон хийгээр ажилладаг автомашины онцгой албан татварыг 50 хувиар хөнгөлөхөөр зохицуулсан бөгөөд энэхүү заалтыг 2017 оны 5 дугаар сарын 1-ний өдрөөс эхлэн дагаж мөрдөхөөр хуульчилсан.

Онцгой албан татвар төлдөггүй байсан эдгээр автомашинд дээрх хуулийн дагуу 375.000-6.675.000 төгрөгийн татвар ногдохоор болсон нь ялангуяа манай улсад хамгийн их эрэлт хэрэгцээтэй байгаа хос тэжээлт буюу “Пруис” машины хэрэглэгч, борлуулагчдад эдийн засгийн урьдчилан тооцоолоогүй, огцом дарамт болж байгаа талаар иргэд, аж ахуйн нэгжээс гомдол, шүүмжлэл ирүүлж байна.

Түүнчлэн татвар нэмэхээс өмнө захиалсан болон лизингээр авсан “Пруис” автомашины захиалсан, борлуулсан, худалдан авагч нарын дунд үл ойлголцол бий болох, гааль дээр хугацаандаа автомашинаа авч чадахгүй бөөгнөрөл үүсэх зэрэг асуудал үүссэн юм байна.

Иймд иргэд, аж ахуйн нэгжийн санал, хүсэлтийг үндэслэн хос тэжээлт, цахилгаан хөдөлгүүрт болон хийгээр ажилладаг автомашинд ногдуулах онцгой албан татварын хэмжээг хуульд заасан хязгаарт багтаан Засгийн газар тогтоох зохицуулалтыг бий болгох зорилгоор Онцгой албан татварын тухай хуульд нэмэлт, өөрчлөлт оруулах тухай хуулийн төслийг боловсрууллаа гэж хууль санаачлагач онцолсон юм.

Мөн 2017 оны 4 дүгээр сарын 14-ний өдөр батлагдсан Онцгой албан татварын тухай хуульд нэмэлт, өөрчлөлт оруулах тухай хуулиар хос тэжээлт, шингэрүүлсэн хийгээр ажилладаг, цахилгаан тэжээлт автомашинд 2017 оны 5 дугаар сарын 1-ний өдрөөс 50 хувийн онцгой албан татвар ногдуулж, уг хуулийн дагуу татвар төлөгчид албан татвар төлсөн байна. Иймд энэхүү хуулийн төслөөр дээр дурдсан автомашинд ногдуулах онцгой албан татварыг Засгийн газар тогтоох боломжтой болох тул 5 дугаар сарын 01-ний өдрөөс хуулийн төсөл батлагдах хүртэл хугацаанд хос тэжээлт, шингэрүүлсэн хийгээр ажилладаг, цахилгаан тэжээлт автомашинд ногдуулсан албан татварыг татвар төлөгчид буцаан олгохоор болжээ. Хэлэлцэж байгаа асуудалтай холбогдуулан гишүүд асуулт тавьж үг хэллээ.

УИХ-ын гишүүн О.Баасанхүү:

-Приусын татварыг буцааж тэглэхээр болж байна. Одоо  дэд сайдуудыг болиулаад хүүхдийн мөнгийг өгөөч ээ. 70 тэрбум төгрөгийг хэмнэх боломж байна. Миний хүүхдийн мөнгийг өгөөч. Хичнээн хэмжээний мөнгө приусын татварын буцаан олголтод өгөх гэж байна.

УИХ-ын гишүүн Д.Сарангэрэл:

-Аливаа зүйлийг  хийхдээ “долоо хэмжиж нэг огтлох ёстой” гэсэн Д.Эрдэнэбат гишүүний саналыг дэмжиж байна. Богино зайнд эргэж буцаж байна шүү. Манай ард иргэд нэг хэсэг эксель маркийн машин унадаг байсан. Одоо энэ нь приусаар өөрчлөгдөж байна. Энэ бол ард түмний хэрэглээ.

УИХ-ын гишүүн Д.Эрдэнэбат:

-Энэ хуулинд хэрэгжих хугацаа оруулах шаардлагагүй гэж бодож байна. Чойжилсүрэн сайд аа, манай АН хүүхдийн мөнгө рүү халдсан заалт оруулж ирээгүй. Харин та нар 40 хувьд нь олгоно гэж байгаа ОУВС-гийн хөтөлбөрийн хүрээнд гаргасан шийдвэрээ эргэж хараач гэж байгаа юм. Та бүхэнд хуурах схем яваад байна гэж ойлгож байна. Приусын татварын буцаан олголтыг 9 сарын нэгэн хүртэл явуулах хэрэгтэй.

Уг хуулийн төслийг зургадугаар сарын 9 буюу маргаашнаас эхлэн мөрдөхийг гишүүд дэмжсэн юм.  Ийнхүү уг хуулийн төслийг эцсийн хэлэлцүүлэгт шилжүүлэв. 

Чуулганы хуралдаан үргэлжилж байна. 

Н.Энх