Спорт, улс төр... Уншихад хүртэл тэс өөр бичилттэй, хоёр өөр үг. Тэгвэл сүүлийн үеийн сонгуультай холбоотой асуудалд жудогийн бөхчүүдийн нэр хүнд холбогдож, хөндөгдсөн асуудалд жудо бөхийн холбоо эрс дургүйцэж байгаагаа илэрхийлж өнөөдөр хэвлэлийн бага хурал хийлээ. Уг сонгуультай холбоотой асуудалд жудо бөхийн тамирчдын сахилга бат хөндөгдсөн учраас 25 000 жудочдыг төлөөлж Б.Пагва, М.Бөхбат нар мэдээлэл хийлээ.
Монголын Жудо Бөхийн Холбоо нь анх 1971 оноос үйл ажиллагаа явуулж эхэлсэн, тив дэлхийн чанартай тэмцээнээс 2000 гаруй медалыг эх орондоо авчирчээ. Ахмад тамирчид, тус спортын гавьяат зүтгэлтнүүд жудо бөхийн холбоо болон түүнд хамаарагдах нийт тамирчид, дасгалжуулагчид нь сахилга батын, захиргааны болон эрүүгийн хуулинд харшлах зөрчил гаргаж байсан удаагүй гэдгийг цохон тэмдэглээд энэ мэдээллийг гаргасан, холбогдсон хүмүүсийг Монголын нийт жудочдоос уучлал гуйхыг шаардсан юм. Мөн тэд спорт бол улс төр биш, жудогийн ариун татами улс төртэй бүү зууралдаасай гэж нэмж уриаллаа.
Б. Энх-Амгалан