Ардчилсан намаас нэр дэвшигч Х.Баттулга охины хамт Монгол Улсын Ерөнхийлөгчийн сонгуулийн Баянзүрх дүүргийн 1 дүгээр хорооны 1655 хэсгийн санал авах байранд саналаа өглөө. Өмнөх санал хураалтад тэрбээр нэлээн орой ирж байсан бол өнөөдөр эрт саналаа өглөө. Саналаа өгснийхөө дараа сэтгүүлчдийн асуултад хариулав.
-Сонгогчдод хандан юу хэлэх вэ?
-Зургаадугаар сарын 6-наас Монгол Улсын ерөнхийлөгчийн сонгуулийн сурталчилгааны ажил эхэлсэн. Хоёрдугаар шат руу орж байна. Сонгуульдаа идэвхтэй оролцож, ирцийг 51-ээс дээш хувьд хүргэж өгөөрэй гэж сонгогчдодоо уриалж байна. Сүүлийн долоо хоногт олны хүч оломгүй хүч гэдгийг харууллаа. Бид 65 гишүүнтэй МАН-ыг УИХ, Засгийн газартай нь ялж, олон олон шийдвэрийг гаргалаа. Хүүхдийн мөнгө, тэтгэврийн нас, Эрдэнэт үйлдвэрийн 49 хувь гэх мэт. Бид олуулаа нийлээд энэ Засгийн газрыг шахаж чадвал ард түмэнд зориулсан олон эерэг шийдвэрийг гаргаж болно гэдгийг нотлон харуулсан сонгууль болж байна гэдгийг онцлон тэмдэглэмээр байна.
-Хүүхдийн мөнгөнийг олгоод эхэллээ. Энд таны оролцоо бий юу?
Хүүхдийн мөнгийг МАН олгосон юм биш. АН ба АН-аас нэр дэвшиж буй миний бие олонтойгоо нийлж шахсаны үр дүнд олгуулж байгаа юм. Энэ бол Засгийн газарт ташуур хэрэгтэй гэдгийг нотолсон ажил юм шүү.
-Ерөнхийлөгчөөр сонгогдвол таны эхний алхам юу байх вэ?
-Алдарт 60 тэрбум төгрөгийг идсэн хуйвалдагчдыг олж тогтоох ажилд ханцуй шамлан орно. Бас оффшорт байгаа улстөрчдийн мөнгийг оруулж ирж, ард иргэдийн өрийг цайруулах ажил руу орно.
В.Бат