АНУ-ын Засгийн  газар Хойд Солонгосын эсрэг хориг тавихаар болсон билээ. “Тус улсын эсрэг Вашингтон маш хатуу хориг арга хэмжээг авах болно” албаныхан мэдэгдсэн юм.  Хойд Солонгос цөмийн болон баллистик пуужингийн туршилт хийж буй нь олон улс болон хөрш орнуудаа заналхийлсээр байна.

Пхеньян өнгөрөгч долоо хоногт өөрсдийгөө “дэлхийн хаана ч хүрэх чадвартай алсын тусгалтай пуужин үйлдвэрлэсэн” хэмээн олон улсад хандан мэдэгдсэн бөгөөд энэхүү пуужин тусах хамгийн эхний газар бол АНУ хэмээсэн билээ.

Тэгвэл уг асуудлаар АНУ-ын Төрийн нарийн бичгийн дарга Рекс Тиллирсон мэдэгдэл хийсэн талаар “Ройтерс” агентлаг мэдээлэв.

Төрийн нарийн бичгийн дарга мэдэгдлийнхээ эхэнд “Бид Хойд Солонгосын дайсан биш шүү дээ. Тэдний буруу ойлголт хоёр улсын дунд хэтэрхий том ангал үүсгээд байна. Хойд  Солонгосын эрх баригчид бүх зүйлийг эерэгээр харж, олон улсын шаардлагыг даган биелүүлэх цаг ирсэн. Хойд Солонгос улс цөмийн хөтөлбөрөөсөө татгалзсан цагт энхтайванч аргаар олон улстай илүү ойртон нөхөрлөх учиртай. АНУ, Хойд Солонгосын дайсан биш мөн хамгийн том аюул нь биш” гэж мэдэгджээ.

Хойд Солонгосын удирдагч Ким Чен Ун энэ оны эхээр АНУ-ыг гол дайснаа хэмээн нэрлэсэн билээ. Пхеньян өнгөрсөн сарын дундуур пуужин туршсан юм.

Б.Дэлгэрцэцэг