Монгол Улсын Ерөнхийлөгч Х.Баттулга захирамж гаргаж Монгол Улсын Засгийн газрын гишүүн, Зам тээврийн сайд асан А.Гансүх, Монгол Улсын Хөдөлмөрийн баатар, гавьяат тамирчин Д.Дагвадорж нарыг бие төлөөлөгчөөрөө томилсон.
Асашёорюү Д.Дагвадорж “Бие төлөөлөгч төсвөөс цалинждаг гэж бодож байж магадгүй. Бие төлөөлөгч гэдэг Ерөнхийлөгчийн чиг үүргийн дагуу хариуцуулсан ажлыг нь биелүүлэх үүрэгтэй. Үүнд төрөөс цалин хангамж авахгүй, элдэв ямба эдлэхгүй. Надад ч тэгэх хүсэл алга. Монгол Улсынхаа хөгжлийн төлөө, 3 сая иргэнийхээ төлөө олсон жаахан нэр хүнд, найз нөхөд болон хүрээлэлдээ тулгуурлан Ерөнхийлөгчийн дуу хоолой болж явна гэдгээ хэлмээр байна” хэмээв.
Тэрбээр Монгол Улсын Ерөнхийлөгчийн Япон улстай харилцах бие төлөөлөгчөөр ажиллах бөгөөд “Хоёр орны харилцааг хөгжүүлэхэд гүүр нь болохын төлөө хичээнэ” гэлээ.
Г.Тэгшсүрэн