МАН-ын Ерөнхий нарийн бичгийн дарга Д.Амарбаясгалан АТГ-т байцаалт өгөхөөр очлоо. Түүнийг 60  тэрбумын санхүүгийн схемийг танилцуулах уулзалтад байсан, хариуцлага хүлээх ёстой гэсэн мэдээллийг НИТХ-ын дарга Ц.Сандуйн зөвлөх А.Ганбаатар хийсэн. Тиймээс энэ асуудлаар тайлбар авахаар АТГ-аас Д.Амарбаясгаланг дуудсан юм байна. Тэрбээр тайлбар өгөхийн өмнө сэтгүүлчдийн асуултад хариуллаа.

Мөн Д.Амарбаясгалан иргэн А.Ганбаатарыг нэр төрд халдсан хэмээн хуулийн байгууллагад хандаж буй аж.

-Таныг 60 тэрбумын бичлэгийн асуудлаас үүдэж дуудсан байна. Та ямар байр суурь илэрхийлэх вэ?

60 тэрбумын бичлэг нийгмийг бухимдуулж байна. Үүний хамгийн том хохирогч нь МАН болж байна. Энэ намын 200 гаруй мянган гишүүд, 2017 оны Ерөнхийлөгчийн сонгуулиар манай намд саналаа өгсөн сонгогчид хохирч байна. Тиймээс 60 тэрбумын гэх энэ асуудлыг нэг талд нь гаргаж, яаралтай шийдвэрлэх шаардлагатай байна.

Өчигдөр А.Ганбаатар мэдээлэл хийж, 60 тэрбумын схемийг танилцуулахад Амарбаясгалан байсан мэтээр олон нийтийг төөрөгдүүллээ. Энэ асуудлыг улам өргөн болгох гэж үзэж байгаад нь харамсаж байна.  Хүмүүс цайрч, их увайгүй үйлдэл хийж байна.

-Өмнө та хэд хэдэн мэдээлэл хийж, энэ бичлэгийг эвлүүлэг гэж  мэдэгдэж байсан?

Би саяханыг хүртэл 60 тэрбумын бичлэгийг эвлүүлэг гэж бодож байсан. Тухайн үед бичлэгт холбогдсон нөхөд энэ эвлүүлэг гэсэн тайлбарыг өгсөн. Мөн Сүхбаатар дүүргийн цагдаагаас энэ бичлэг эвлүүлэг гэсэн албан тоотыг намд ирүүлсэн. Энэ бүхнийг үндэслээд би 60 тэрбумын бичлэг эвлүүлэг гэсэн итгэл үнэмшилтэй явж ирсэн. Харамсалтай нь намын УЗ-ийн хурал дээр Ц.Сандуй энэ бичлэг бодитой гэдгийг өөрөө хүлээн зөвшөөрсөн. Эвлүүлэг гэж олон нийтэд мэдээлэл хийж байсандаа харамсаж байна.

-А.Ганбаатар таныг уулзалтад оролцсон гэж ярьсан?

Би энэ уулзалтад байгаагүй. Би 2014 онд АНУ-д сурч байсан. Үүнийг журмын нөхөд ч НИТХ-ынхан ч мэднэ. Би ийм яриа хэлэлцээрт ордоггүй. 2014 онд би ийм хэлэлцээрт орох хэмжээний албан тушаалтай байсан уу гэдгийг бодох хэрэгтэй.

-Таныг байсан гээд зураг үзүүлсэн шүү дээ?

-Тэр зургийг би харсан. 2015 оны 9, 10 дугаар сарын үеийн зураг байна. 2015 оны 6 дугаар сард би эх орондоо буцаж ирсэн. 9 дүгээр сард нийслэлийн намын хороон дээр Ц.Сандуй, А.Ганбаатар нар намайг болон хэсэг нөхдийг урьж, хоол идэж, хамтрах талаар ярилцсан. Тэр үеийн зураг байна лээ.

-Ц.Сандуй эвлүүлэг биш гэдгээ хүлээн зөвшөөрсөн байхад Удирдах зөвлөл яагаад огцруулаагүй юм бэ?

-Намын удирдах зөвлөлөөс огцруулах шаардлагатай, шаардлагагүй гэсэн шийдвэр гараагүй. Хариуцлага тооцох ёстой гэсэн байр суурийг гишүүд илэрхийлсэн.

-Та Ц.Сандуйг огцруулах бичигт гарын үсэг зурсан байсан?

Би НИТХ-ын төлөөлөгч. Энэ бол МАН-д итгэж, нийслэлийн удирдаад авч яваач гэсэн найдвар өгсөн олон мянган сонгогчийн эрх ашгийн асуудал. Ийм зүйлийг хааж, халхавчлаад явах ёсзүйн эрх, хэмжээ надад байхгүй. Би Сандуйг огцрох ёстой гэж үзэж байгаа. Тэгээд иргэн Сандуйгийн хувиар шүүх цагдаагаараа яваад, өөрийн нэр төр болоод намын нэр төрийг сэргээх ёстой. Тиймээс би огцруулах бичигт гарын үсэг зурсан.

В.Бат