Унгарын нийслэл Будапешт хотноо Жүдо бөхийн ДАШТ амжилттай үргэлжилж байна. Эмэгтэйчүүдийн -57 кг-ийн жингийн аваргын алтан медалийг Монгол Улсын тамирчин Д. Сумъяа хүртлээ. Тэрбээр “Рио”-гийн олимпийн мөнгөн медальтай тамирчин юм.
Д.Сумъяа Японы тамирчин, дэлхийн номер нэг жүдоч Ёшида Цукасаг ялсанаар алтан медалийн эзэн боллоо.
Алтан медалийн эзэн болоод буй Д.Сумъяа нь Дэлхийн аварга цолыг хүртсэн Монгол Улсын хоёр дахь эмэгтэй жүдоч юм. Жүдо бөхийн ДАШТ-ийг Монгол Улсын Ерөнхийлөгч, Монголын Жүдо бөхийн холбооны Ерөнхийлөгч Халтмаагийн Баттулга үзэж, баг тамирчдаа дэмжиж буй билээ.
Уг тэмцээний дараа Монгол Улсын Ерөнхийлөгч Х.Баттулга хэвлэлийнхэнд “Бидний хувьд алтан медаль маш чухал. Бид алтан медалийн төлөө энд ирсэн. Эмэгтэйчүүдийн -47 кг-ийн жинд алтан медаль авахаар төлөвлөж байсан ч харамсалтайгаар мөнгөн медаль хүртсэн. Өнөөдөр бидний хувьд сайхан өдөр боллоо. Бид Японыг ялж, аваргын алтан медалийн эзэн болсон. Францын баг анхны медалиа зүүж байхад бид дөрвөн медальтай зогсч байна. Жүдо бөх Монголд номер нэг спортын нэг. Бид өнөөдөр Монголын шинэ баатруудыг төрүүлж байна” хэмээн хэлжээ.
Б.Дэлгэрцэцэг