УИХ-ын дарга М.Энхболдод хаягласан албан бичгүүд ар араасаа хөвөрч байна. УИХ дахь АН-ын бүлгийнхэн спикерт бичиг илгээж, ээлжит бус чуулганыг яаралтай хуралдуулахыг хүссэн. Сонгуулийн үеэр шоу хийж, хүүхэд бүрт мөнгө өгсөн ч одоо хаанаас, ямар мөнгө өгөх нь тодорхойгүй болсныг тус намын албан бичигт дурджээ. 9, 10 дугаар сарын хүүхдийн мөнгөнд 110 тэрбум төгрөг шаардлагатай ч эх үүсвэрийг шийдээгүй учраас  олгогдохгүй байх эрсдэл үүсээд буй. Тиймээс ээлжит бус чуулганыг хуралдуулан төсөвт тодотгол хийж, асуудлыг шийдэх ёстой гэсэн үгийг сөрөг хүчнийхэн илгээв.

Үүний дараа Ерөнхийлөгч Х.Баттулга УИХ-ын даргад албан бичиг хүргүүллээ. Тус бичиг мөн л УИХ-ын ээлжит бус чуулганыг ойрын хугацаанд яаралтай хуралдуулах утгатай. Явах бэрд үхэр тугал нийлэх хамаагүй гэдэг. Намрын ургац хураалтын ажлыг эрчимжүүлэх, өвөлжилтийн бэлтгэл хангах, нийслэлд гарсан мал, амьтны гоц халдварт шүлхий өвчний тархалтыг яаралтай зогсоох, 2018 оны улсын төсвийг хэлэлцэж эхлэх зэрэг хариуцлагатай цаг үед Монгол Улс үүрэг гүйцэтгэгч Засгийн газартай байгаа нь төрийн ажил цалгардах, нийгэм, эдийн засагт сөрөг үр дагавар авчирна гэж Ерөнхийлөгч үзэв. Тиймээс УИХ-ын ээлжит бус чуулганыг нэн даруй хуралдуулж шинэ Ерөнхий сайдыг томилж, Засгийн газрыг эмхлэн байгуулах шаардлагатай байгааг М.Энхболдод уламжлав.

Төрийн тэргүүн болоод сөрөг хүчний үгийг УИХ-ын дарга М.Энхболд сонсох эсэх нь одоогоор тодорхойгүй байна. Төрийн тэргүүн болоод сөрөг хүчний хэлж байгаа шиг улс оронд шийдвэр гаргах шаардлагатай олон асуудал тулгамдаж буй. Мөдхөн өвөл ирнэ. Хадлан тэжээлийн хангалт муу байгааг Үндэсний статистикийн хорооноос мэдээлж буй. Энэ өвөл ахиухан хэмжээний цас орохыг ч цаг уурын байгууллага одооноос анхааруулж байгаа. Товчхондоо УИХ ажлаа хийх шаардлага тулгарсан гэсэн үг. Ерөнхий сайдаа томилж, гүйцэтгэх засаглалын байгууллагаа ажиллуулахгүй бол олон асуудал хэн нэгний ширээн дээр цаас болон хэвтсээр байх нь.

Улс төрийн амьдрал сэм уулзалт, нам хуйвалдаанаас өөрцгүй. Бизнесийн салбар хэрхэх нь мэдэгдэхгүй хүлээлттэй. Цалингаа нэмүүлэх багш нарын тэмцэл эмч нараар хүрээгээ тэлж, хэзээ мөдгүй сургууль, эмнэлэг ажиллахгүй гээд хаалгаа барьж магадгүй нь. Тэд ажил хаяхаа удаа дараа сануулсаар буй. Гэвч тэдний асуудлыг сонсч, цалинг нь нэмэх тухай ярих Засгийн газар алга.  

Ерөнхийлөгчийн саналаар бол өнөөдрөөс УИХ-ын ээлжит бус чуулганыг зарлан хуралдуулах ёстой. УИХ-ын дарга ямар нэг шийдвэр гаргасан эсэх нь одоогоор тодорхойгүй байна.

В.Бат