У.Хүрэлсүхийн Засгийн газрын бүрэлдэхүүн тодорч, АТГ-гаас эрх ашгийн зөрчилгүй гэсэн хариу аван Ерөнхийлөгчид өргөн барьсан зөвшилцлийн хариугаа хүлээж байна. Ямартай ч Ерөнхийлөгчийн зүгээс зөвшилцлийн хариуг өргөн барихгүй бол ирэх долоо хоногт Ерөнхий сайд Засгийн газрын бүрэлдэхүүнээ УИХ-д өргөн барих бололтой.
Шинэ Засгийн газрын танхим томилогдох гэж байгаатай холбогдуулан эдүгээ үүрэг гүйцэтгэж байгаа сайд нар салбар салбартаа хийсэн ажлаа дүгнэн, үдэлт хийж байгаа бололтой. Тухайлбал, өнөөдөр ХЗДХ-ийн сайдын үүрэг гүйцэтгэгч С.Бямбацогт яамны хамт олонтойгоо уулзаж, өнгөрсөн хугацааны ололт амжилт, алдаа дутагдлаа дүгнэн хэлэлцэж, дурсгалын зураг татуулжээ.
Тэрбээр нэг жил богино мэт боловч өнгөрсөн хугацаанд хийсэн ажлаа том зургаар нь нэгтгэж харахад “Хэлэх үг, хийсэн ажилтай” байгааг онцолж, 2017 онд тус яамнаас бие даасан 10 хууль, 4 нэмэлт өөрчлөлт, 1 УИХ-ын тогтоолыг УИХ-аар батлуулжээ. Одоогоор 20 гаруй хуулийг боловсруулж байгаа бөгөөд 3 хуулийн төслийг УИХ-д өргөн бариад байгаа аж.
Тэр дундаа халуунд нь халж, хүйтэнд нь хөрж байдаг салбарын албан хаагчдынхаа ажиллаж, амьдрах нөхцөл байдлыг дээшлүүлэхэд анхаарал хандуулж, үүний үр дүнд тодорхой ахиц дэвшил авчирсныг ч дурьджээ. Тодруулбал, Цагдаагийн албаны тухай, Монгол Улсын Хилийн тухай, Шүүхийн шийдвэр гүйцэтгэх тухай, Дотоодын цэргийн тухай зэрэг салбарын хуулиудыг батлуулж, алба хаагчдынхаа өмнө тулгамдаж байсан тодорхой асуудлыг шийдвэрлэсэн байна. Цаашдаа яамны хамт олноо энэ эрчээ алдахгүй улам сайн ажиллана гэдэгт итгэлтэй байгаагаа С.Бямбацогт илэрхийлж, нийт албан хаагчиддаа ажилд нь амжилт, амьдралд нь сайн сайхныг хүссэн байна.
Н.Нягт