УИХ-ын чуулганы нэгдсэн хуралдаанаар Засгийн газрын гишүүдийг томилох асуудлыг хэлэлцэж байна. Хэлэлцэж байгаа асуудалтай холбогдуулан гишүүд асуулт тавьж, үг хэлж байгаа юм. УИХ дахь АН-ын бүлгийн дарга Д.Эрдэнэбат хэлэлцэж байгаа асуудалтай холбогдуулан:

-Та бодлогын биш тохиролцооны Засгийн газар байгуулчихлаа, У.Хүрэлсүх сайд аа. Монгол Улсын зовлон уул уурхайгаас эхэлсэн юм Шинэ Ерөнхий сайд Засгийн газар явцгүй дээ. “Оюутолгой”-н учрыг олоорой. “Оюутолгой”-г эхлүүлэхэд дөрвөн компани байгуулсны хоёр нь оффшор. Үүнийг шалгаарай. Н.Цэрэнбат гэдэг 11 компанитай залуу  УИХ-д орж ирээд нэг ч өдөр төрийн ажил хийлгүй, сайд болж байна. Боловсролын салбарт жил гарангийн хугацаанд гурван сайд томиллоо. Боловсролын салбараа цэгцлээрэй хэмээн захив.

Харин гишүүн Д.Оюунхорол “АН Ерөнхий сайдыг томилохдоо багтай нь дэмжинэ гэсэн. Гэтэл өнөөдөр энэ байр сууринаасаа ухарч, улстөржиж байна. Улс төр хийж байгаа хүмүүсийн үг үйлдэл бүхнээс МАН-ыг эв нэгдэлтэй байлгахыг шаардаж байна. Ц.Нямдорж, Ө.Энхтүвшин нарыг яагаад Засгийн газарт орсон бэ гэж сөрөг хүчин улстөржиж байна.  Монголын парламентын өв тээгчид бол Ц.Нямдорж, Д.Лүндээжанцан, Ө.Энхтүвшин, Н.Энхболд. МАН-ын дотоод хэрэгт АН оролцохоо болимоор байна. Одоо 65-ын бүлэг талцалгүй нэг бүлэг болох цаг нь болсон” хэмээлээ.

Н.Энх