УИХ-ын чуулганы нэгдсэн хуралдаан хоёр өдөр цаг сунган хуралдаж, Засгийн газрын сайд нарыг хэлэлцэн томиллоо. Ийнхүү У.Хүрэлсүхийн Засгийн газрын танхмын сайд нар өнөөдрийн 00.30 цагт бүрэн бүрэлдэхүүнээрээ томилогдон батлагдлаа. Засгийн газрын танхимын гишүүд бүрэн бүрэлдэхүүнээрээ томилогдсонтой холбогдуулан Монгол Улсын Ерөнхий сайд У.Хүрэлсүх үг хэллээ. Тэрбээр:
-Та бүхэн хариуцсан ажилдаа эзэн болж, хариуцлагатай шийдэмгий шуурхай ажиллана гэдэгт итгэл төгс байна. Манай танхимын сайд нар 100 хувь парламентаас томилогдож байгаатай холбоотой "давхар дээл" гэсэн шүүмжлэл гарч байна. Би "Давхар дээл"-ийг эрх ямба гэж харахгүй байгаа. Давхар хариуцлагыг хүлээх болно.Тиймээс давхар хариуцлагатай сайд нар гэвэл ононо.
Та бидний хийх ажил, хүндхэн сорилт ирж байна. Улс орны эдийн засгийн төсөв, санхүүгийн байдал хүнд байна. Бодит байдлыг ард түмэндээ үнэнээр нь хэлж байх болно. Монголчууд бид 62 их наяд төгрөгийн өр зээлтэй. Үүнийг 3 сая хүн амд хуваавал нэг хүнд 21 сая төгрөгийн өр ногдохоор байна. Тун удахгүй өр төлөх үүрэг Засгийн газрын өмнө тулгарч байна.
Хэдийгээр өнгөрсөн хугацаанд эдийн засагт эерэг үзүүлэлт гарсан ч өр зээлэндээ баригдан, тамирдаж туйлдсан Засгийн газрыг шинэ Засаг хүлээн авч байна. Манай Засгийн газар хичээн зүтгэнэ. Нийгмийн шударга ёсыг сэргээнэ.
Хууль дээдлэн, өндөр ёс суртахуунтай ажиллахыг шаардана. Манай Засгийн газар авлига, хээл хахуультай тэмцэнэ. Ард түмэн ч үүнд нэхэл хатуу байгаа. Эдийн засгаа олон тулгуурт болгох нөхцөл тавина.
Эдийн засгаа сэргээн хөгжүүлэхэд иргэн бүрийн оролцоо чухал байна. Хувийн хэвшлийнхэнтэйгээ гар нийлж ажиллана. “Хүүхэд бүр цэцэрлэг” хөтөлбөрийг хэрэгжүүлнэ. Бид энэ бүхнийг бүх талаас нь судлан үзэж, ажиллана.
Манай Засгийн газрын эрхэм үүрэг Монгол төр, Монгол хүн байх болно.
Мөнх тэнгэр мандан бадраг хэмээлээ.
Н.Энх