АН-ын дарга Н.Алтанхуяг болон УИХ дахь тус намын бүлгийн дарга Ч.Сайханбилэг нартай уулзаж ярилцлаа.
-Ойрын үед танай намтай холбоотойгоор өрнөж буй үйл явдлуудыг та дүгнэж хэлэх үү?
-
Н.Алтанхуяг: ҮЗХ-ны хурал болж АН-ын даргын гаргасан хамтарсан Засгийн газраас гарах тухай асуудлыг хэлэлцэсэн. ҮЗХ-ны гишүүд санал нэгтэйгээр түүхэн үүргээ гүйцэтгэж ард түмэн, эх орон, эдийн засгийн хөгжлийн суурийг тавихын төлөө хангалттай сайн ажилласан хэмээн үзэж хамтарсан Засгийн газраас гарах нь зүйтэй гэдгийг санал нэгтэйгээр гаргасан. ҮЗХ-ноос гаргасан хурлын тогтоолдоо гол зүйлүүдээ тодорхойлсон байгаа. Ард түмнийхээ аж амьдралыг дээшлүүлж, үйлдвэрлэлийг хөгжүүлэх ажлын байр бий болгох нөхцлийг бүрдүүлэх, ашигт малтмалын орлогоос иргэн бүрт хүртээх, үсрэнгүй хөгжсөн эдийн засгийг цогцлоон байгуулах. Шударга бусыг тогтоож ардчилал хүний эрхийг хамгаалах. 2008 оноос АН-аас дэвшүүлсэн мөрийн хөтөлбөрүүдийг хэрэгжүүлэх, ард түмэнд амласан амлалтаа биелүүлэх зорилгоор хамтарсан Засгийн газарт орж ажилласанаа цохон тэмдэглэсэн. Эрдэнийн хувийг иргэддээ үнэгүй олгох, дэлхий дахиныг хямарсан эдийн засгийн хямралыг гарз хохирол багатайгаар даван туулж гарлаа. Сонгуулийн тогтолцооны шинэчлэлийг эхлүүллээ. Иргэний ухаалаг үнэмлэх, санал тоолох машин гээд шударга сонгууль явуулах нөхцлийг бүрдүүллээ. Орон нутагт төсвийн эрх мэдлийг шилжүүлэх ажлыг эхлүүлсэн. Мэргэжилтэй ажилтан бэлтгэх чиглэлээр дорвитой алхам хийсэн.
Ардчиллын үнэт зүйл бүдгэрэх, нийгэмд шударга бус үйлдэл даамжрах, ард түмний амьдрал төдийлөн дээрдэхгүй байгаа. Авилга хээл хахуультай тэмцэх ажил зогсонги байдалд орсон. Шударга ёсыг тогтоох ажил төдийлөн хийгдэхгүй байна гэдгийн АН-ын ҮЗХ-ны хурлын тогтоолд тэмдэглэсэн байгаа. Хийх ёстой ажлуудын хөрөнгө мөнгө удааширсан гэж үзжээ. 3,4 жилийн дараа монголын ард түмний нийтлэг эрх ашиг хамтарсан засгийн ажил болж бүтлээ. Тустай ажиллах цаг нь ирсэн байна гэсэн зүйлийг хэлж байна. Ардчиллын үнэт зүйлийг хамгаалад АН байр суурин дээрээ ирэх нь зөв гэсэн нийгмийн захиалга байна гэж үзэж саналаа нэгтгэж чадлаа.
-ҮЗХ-ны өчигдрийн хурал дээр намын даргад хаягласан шүүмжлэлүүд их гарсан. Үүнийг та хэрхэн хүлээж авч байна?
-Хүлээж авах ёстой бүх шүүмжлэлийг тусгаж авна. Ганцхан өчигдөр ч биш, Ардчилсан намын дарга хэнбугай ч байсан намд ил тод байдал, шүүмжлэл нээлттэй. Ардчилсан нам зөвхөн нам дотроо бус нийгэмд нээлттэй байдаг.
Тийм болохоор надад хаягласан шүүмжлэлийг Ардчилсан намын даргын хувьд хүлээж авч байгаа.
-Засгийн газраас гарах шийдвэрээ гаргалаа. Гарах өргөдлөө хэзээ нөгөө намдаа өгөх вэ?
-Өнөөдөр 14 цагийн үед өгчихнө.
-Засагт орж ажилласан сайдуудаа зогсоож байгаад асуулга тавьсан. Таны хувьд З.Энхболд гишүүний шүүмжлэлээс хүлээж авах нь аль байв?
-Хамтарсан Засгийн газарт орж ажилласан сайдуудаа өмнөө зогсоогоод байцаасан нь манай намын давуу тал гэж харж байгаа. Яригдсан асуудлыг энэ нь зөв гэж хэлэх хэцүү. Харин кабинетад орж ажилласан сайдууд маань хийсэн ажлаа сүрхий хамгаалж байна билээ.
-Өчигдөр ЗТБХБ-ийн сайд Х.Баттулга Энержи Ресурс компани Монголын Засгийн газартай 70 жилийн тогтвортой байдлын гэрээ хийх гэж байгаа тухай хэлсэн. Энэ гэрээний төсөл танай намыг хамтарсан Засгийн газраас гарахад нөлөөлсөн үү?
-Би хоёр цагаас хойш Тэргүүн шадар сайдын ажил хийхээ болих байх. Намайг энэ суудалд байх хугацаанд тийм асуудал Засгийн газар дээр яригдаагүй гэдгийг нотлон хэлье.
-Өчигдрийн Засгийн газрын хуралдаан дээр яриагүй юу?
-Үгүй.
-Сангийн сайд С.Баярцогт өчигдрийн хуралдаан дээр нууцын зэрэглэлтэй асуудал оруулсан. Энэ биш үү?
-Би өчигдрийн хуралдаан дээр орчихоод АИХ-ын депутатуудтайгаа уулзахаар гараад явчихсан. Тэр хооронд юу яригдсаныг мэдэхгүй.
-Таныг мэдээлэлд ойр байгаа эх сурвалж гэдэг утгаар нь асуугаад байна л даа. Яагаад хувийн компанитай хийж байгаа тогтвортой байдлын гэрээг нууцын зэрэглэлд оруулж байгаа юм бол?
-Надад энэ талаар мэдээлэл байхгүй.
-Засгийн газраас гараад сайдууд ажлаа өгөх болж байна. Харин УИХ-ын түвшинд зарим суудлыг тохиролцоогоор хувааж авсан байгаа?
Ч.Сайханбилэг: Өнгөрсөн долоо хоногийн пүрэв гаригт хийсэн сэтгүүлчидтэй хийх уулзалт дээр намын дарга хамтарсан Засгийн газраас гарах байр сууриа илэрхийлсэн. Түүнээс хойш долоо хонож байна. Энэ хооронд бид өнгөрсөн лүүгээ чулуу шидэж, харлуулах, эсвэл магтан дуудах үйлдэл гаргаагүй. Өчигдөр ҮЗХ-ны хурлаар шийдвэрээ албан ёсоор баталгаажууллаа. Гэвч энэ хооронд олон үйл явдал болсон. Шатахуун, өргөн хэрэглээний барааны үнэ өссөн. УИХ дээр яригдаж байна. Ардчилсан намын бүлэг ажлаа хийлээ, одоо гарлаа, амжилт алдаагаа хамтарч хариуцна гэдгээ илэрхийлсэн. Гэтэл нөгөө талаас юу гарч байна. Ардчилсан намаас болоод шатахууны үнэ өслөө гэдэг хуйвалдааны онол шиг зүйлийг тодорхой албан тушаалтны хүмүүс өгөөд эхэлсэн. Энэ бол хариуцлагагүй мэдэгдэл гэж бодож байна. Шатахууны үнийн өсөлтийг манай намын бүлэг эрх бүхий албан тушаалтнуудаас нэлээн ширүүн асуулга тавьсан. Мөн тодорхой хүмүүсийг огцруулах саналыг УИХ-д өргөн барихаар болсон. Өнөөдөр Ардчилсан намын бүлгийн гишүүд Монголбанкны Ерөнхийлөгчийг огцруулах саналд гарын үсэг зурчихсан байгаа. Энэ мэдээлэл хэвлэл мэдээллийн нэг ч хэрэгслээр яваагүй. Харин АН-ыг буруутгаж байгаа тал нь долоо хоногийн турш хавтгай мэдээлэгдлээ. Асуудлыг хурц тавьсны үндсэн дээр валютын ханш 60 төгрөгөөр буураад явж байна. ажилдаа хариуцлагатай хандах нь ямар бололцоо олгохыг долоо хоногийн хугацаанд харлаа. Түүнээс биш өнөөдөр 3.4 жил хамтарч ажилласан хүмүүсээ харлуулах гээгүй. Монгол ардын зүйр цэцэн үгт байдагчлан идсэн эрүү хувхайрч идүүлсэн бут ургадаг юм.
УИХ дахь албан тушаалтнууд үлдэнэ гэсэн үг үү?
Манай намын нэр дээр засагт ажиллаж байгаа сайдууд чөлөөлөгдөх хүсэлтээ гаргана. УИХ дээр асуудал хөндөгдөхийг хэлж мэдэхгүй байна.