УИХ дахь МАН-ын бүлгийн дарга Д.Хаянхярваа МАН-ын даргад нэрээ дэвшүүлэхээ албан ёсоор мэдэгдлээ. Тэрбээр “МАН-ын даргын сонгууль шударга явагдана гэдэгт итгэлтэй байна. Их хурлын төлөөлөгчид эрүүл саруул ухаанаар хандаж, намын даргаа сонгоно гэдэгт эргэлзэхгүй байна” гэв.
Мөн Д.Хаянхярваа “Би ямар нэг фракцид харьяалагддаггүй. Би анх Н.Энхбаяр гэдэг хүнийг дарга байхад УИХ-д нэр дэвшиж орж ирсэн. Сү.Батболдыг байхад Сангийн сайдаар дэвшиж ажилласан. М.Энхболдын үед бүлгийн дарга болж, анх удаа намын Удирдах зөвлөлд орж ажилласан. Надад ямар нэг бүлгийн эрх ашиг байхгүй” гэсэн байр суурийг илэрхийлэв.
Тэрбээр намын дарга болвол МАН-ын талцалд гол анхаарлаа хандуулж ажиллахаа мэдэгдэв.
МАН-ын 28 дугаар их хурал энэ сарын 20-22-нд болно. Тус хурлаар МАН-ын шинэ даргыг сонгох юм. Одоогоор Ерөнхий сайд У.Хүрэлсүх, УИХ-ын гишүүн Д.Хаянхярваа нар МАН-ын даргад нэр дэвшихээ мэдэгдээд байна.
Б.Энэрэл