АНУ-ын Ерөнхийлөгч Дональд Трамп өчигдөр эртний түүхт Иерусалем хотыг Израйлийн нийслэл хэмээн мэдэгдсэн билээ.

Тэрбээр уг мэдэгдлийнхээ дараа Израйлийн Тель Авив хотноо байрлах АНУ-ын Элчин сайдын яамаа Иерусалем хот руу нүүлгэх зарлиг буулгажээ. Арабын орны тэргүүн нар Трампын дээрх шийдвэрт ихээхэн сэтгэл дундуур буйгаа илэрхийлж, “Ойрхи Дорнодод хэзээ дуусахааргүй хямралыг Трамп эхлүүлчихлээ” гэж мэдэгдэв.

Тэгвэл Палестины Ерөнхийлөгч Мухмад Аббас “Иерусалем хот бол Палестины нийслэл хот. Энэ бол жинхэнэ бодит үнэн” гэж хэллээ.  Тэрбээр мөн АНУ-ын Дэд ерөнхийлөгч Майк Пейнсийг эх орондоо хүлээн авахаар татгалзаж, АНУ шийдвэрээ эргэн харахгүй бол бид яриа хэлэлцээр хийхгүй” гэв.

Майк Пейнс Иерусалем хотын асуудлаар Ойрхи Дорнодын орнуудад айлчлахаар төлөвлөж байгаа юм. Түүний эхний зогсоол Палестин байсан юм.

Мөн Трампын дээрх мэдэгдлийн дараа Иерусалем хот дахь олон мянган палестинчууд эсэргүүцлийн жагсаал зохион байгуулж, Цагаан ордны тэргүүний зургийг галдан шатаасан байна.

Б.Дэлгэрцэцэг