Иргэд, олон нийт онц байдал зарлахыг шаардаж эхэллээ. Утаа, агаарын бохирдол хэд дахин нэмэгдсэн нь эрс мэдрэгдэж буй учраас иргэд амь нас, эрүүл мэндийнхээ төлөө ийм шаардлага тавьж байна. Зөвхөн гэр хороолол бус хотын төв ч утаандаа сүүмийж, урдах хойдох үзэгдэхээ больж буйг амтай бүхэн нь хэлж, ярьж байна.
Агаарын чанарын мэдээгээр яг одоо МҮОНРТ-ийн орчмоор “Маш их бохирдолтой” гэсэн үзүүлэлтийг зааж байна. Мөн баруун дөрвөн зам, Баянхошуу орчмоор агаарын чанар хүний эрүүл мэндийг хордуулах хэмжээнд хүрснийг албаны сайтаас харж болно.
Агаарын чанарын индекс 50 байх ёстой. Хүний эрүүл мэндэд сөрөг нөлөөгүй гэсэн үг. Харин яг одоо МҮОНРТ орчимд 779, Баруун дөрвөн замд 539, Баянхошуунд 1150 гэсэн тоог зааж байна. Агаарын чанар 10 дахин муудсан гэсэн үг. 501-ээс дээш байвал хүний эрүүл мэндэд хортой, АЮУЛТАЙ гэсэн харанга дэлдэх ёстой.
Агаарын чанар 500-аас дээш үзүүлэлттэй байвал ИРГЭД яах ёстой вэ? Хүн бүр гадаа биеийн хүч шаардсан ямар ч төрлийн ажил хийхээс зайлсхийх гэртээ байх хэрэгтэй. Цэвэр агаарт салхинд гарах хэрэгтэй. Архаг хууч өвчтэй хүмүүс даралтаа тогтмол хянах, эмчийн хяналтад байж эмийг хугацаанд нь уух шаардлагатай. Нүүрстөрөгчийн дутуу исэл их хэмжээгээр гаргадаг эх үүсвэр (тухайлбал автозам)-ээс хол байх хэрэгтэй гэсэн зөвлөмжтэй. Харин Улаанбаатарчууд хоёр настай балчираас эхлээд бүгд ажил, амьдралаа залгуулах гэж шогшиж явна. Хүний төлөө амьд яваагүй ч эрүүл орчинд амьдрах Үндсэн хуулийн эрхтэй. Амьсгалах уу, үхэх үү?!!!
Б.Энэрэл