Засгийн газрын хуралдаанаар “Эрдэнэт” үйлдвэрийн 49 хувийн хувьцааг төрийн өмч болгосонтой холбогдуулан “Монгол зэс корпораци” компаниас өнөөдөр мэдээлэл хийлээ.
УИХ-ын тогтоолоор өнгөрсөн оны хоёрдугаар сард “Эрдэнэт” үйлдвэрийн 49 хувийг “хэлцэл хийх” замаар төрийн өмчид шилжүүлэхийг Засгийн газарт даалгасан. Гэвч хувьцааг төрийн өмчид шилжүүлэх нь хууль бус болохыг Улсын Дээд шүүхээс тогтоожээ. Өчигдөр Засгийн газрын ээлжит бус хуралдаанаар “Эрдэнэт”-ийн 49 хувийг төрд шилжүүлсэн. “Монгол зэс корпораци” энэ шийдвэрийг хувийн өмчийг төр хууль бусаар, булааж авсан үйлдэл гэж үзэж байна. Засгийн газар Дээд шүүхийн шийдвэрийг үл тоосон энэ үйлдлээ буцаахгүй бол “Монгол зэс корпораци” арбитрын шүүхэд хандана гэлээ.
"Монголын зэс корпораци" компанийн ТУЗ-ийн дарга М.Мөнхбаатар "Засгийн газрын нэр бүхий гишүүд хэвлэлийн хурал хийж манай компанийг Засгийн газартай гэрээ хийсэн мэтээр мэдээлсэн. Бидний зүгээс Засгийн газартай ямар нэгэн гэрээ хийгээгүй. Бид улс төрийн хугацаатай амлалтын золиос болж байна. Өнгөрсөн пүрэв гаригт Засгийн газар гэнэт хурал хийж шийдвэр гаргаж байгаа нь амлалттай холбоотой. Засгийн газар Дээд шүүхийн шийдвэрийг давж, үгүйсгэж байгаад харамсаж байна. Засгийн газрын зарим гишүүдийн хэлж байгаагаар хувьцааг буруугаар авсан гэж үзэж байгаа бол шүүхэд хандах эрх нь Засгийн газрын гишүүд болон тэдгээрийн агентуудад бий. Үндсэн хуулийн цэц дээр маргаан явагдаж байгаа гэдгийг та бүхэн мэдэж байгаа. Нэр бүхий иргэд өнгөрсөн 2017 оны хавар Үндсэн хуулийн цэцэд хандсан байсан. Гэтэл энэ маргаан явж байхад Засгийн газар хоёр ч удаа Эрдэнэт үйлдвэрийн асуудлаар шийдвэр гаргаж байгаад гайхаж байна. Үндсэн хууль болон бусад хууль тогтоомж дээр Засгийн газар нь хууль дээдлэх түүнийг хэрэгжүүлэх үүрэгтэй байдаг. Гэтэл Дээд шүүхийн шийдвэрийг биелүүлсэнгүй. Бид Засгийн газарт шүүхийн шийдвэрийг биелүүлэх хүсэлт тавьсаар ирсэн. Дээд шүүхийн шийдвэр гарч, хувьцааны бүртгэл сэргэсний дараа ТУЗ-ийн хурлаа хийж асуудал шийдэгдлээ гэж бодож байсан. Эрдэнэт үйлдвэрийн 49 хувийг худалдаж авсан гэрээ хэлцэл Английн хуулиар хийгдсэн. Ямарваа нэгэн маргаан байвал олон улсын арбитрын шүүхэд очихоор байгаа" гэлээ.
М.Дөлгөөн