УИХ яаралтай хэлэлцэх асуудалд утааг оруулан, шуурхай хэлэлцэн батлав. Агаарын бохирдол гамшгийн хэмжээн хүрч, Онц байдал зарлах саналыг оны өмнөхөн Ерөнхийлөгч УИХ-д хүргүүлсэн. Энэ асуудлаар УИХ-аас ажлын хэсэг гарч ажиллаж байгаа. Ажлын хэсэг өнгөрсөн хугацаанд хоёр удаа хуралдаж, бүрэлдэхүүнд нь багтсан гишүүд нийслэлийн гэр хорооллоор ажиллаж, бодит байдалтай газар дээр нь танилцахаар болсон. Тиймээс ч энэ амралтын өдрүүдэд эрхэм гишүүд гэр хороололд ажиллаж байгаа байх, гэхдээ цас орж, утаа салхинд хөөгдсөн өдрүүд таарч байна.
Ер нь Ерөнхийлөгч ч, УИХ-ын дарга ч гэр хорооллыг оронсууцжуулж байж агаарын бохирдлыг бууруулна гэдэг байр суурьтай байна лээ. Ингэхдээ хямд өртөгтэй орон сууцыг иргэдээр өөрсдөөр нь бариулах хэрэгтэй гэсэн саналыг гаргаж байсан. Ерөнхий сайд У.Хүрэлсүх агаарын бохирдлыг бууруулах талаарх арга хэмжээг, ипотекийн зээлийг үргэлжлүүлэхээ мэдэгдэнэ лээ.
УИХ-аас “Агаарын бохирдлыг бууруулахтай холбогдуулан авах зарим арга хэмжээний тухай” УИХ-ын тогтоолыг баталлаа.
Хэдийгээр утаа гамшгийн хэмжээнд хүрсэн ч Ерөнхийлөгчийн ирүүлсэн саналын дагуу УИХ хуулийн хүрээнд өнөөдөр онц байдал зарлах боломжгүй аж. ҮАБЗ-өөс өгсөн зөвлөмжийн дагуу гаргасан тогтоол, шийдвэрүүдийн хэрэгжилт, явцын талаар хоёрдугаар сарын 01-ний дотор Засгийн газар УИХ-д танилцуулах юм. Нөгөөтэйгүүр, сүүлийн жилүүдэд агаарын бохирдлыг бууруулах чиглэлээр зарцуулсан хөрөнгө, санхүүжилтийн үр ашгийг үргэлжлүүлэн хянаж шалгах гэнэ.
Агаарын бохирдлыг бууруулах УИХ-ын тогтоолд “Улаанбаатар хотод байгаа түүхий нүүрсээр ажилладаг халаалтын нам даралтын зуухнуудыг 2019 оноос хаана. Сургуулийн өмнөх, ерөнхий болон мэргэжлийн боловсрол, дээд сургуулийн хичээлийн жил эхлэх, дуусах болон улирлын амралтын хуваарийг өөрчлөх асуудлыг судалж, 2018 онд багтаан шийдвэрлэж, хэрэгжүүлнэ
Гэр хорооллын дахин төлөвлөлтийн ажлыг эрчимжүүлэх, гэр хорооллын дэд бүтцийг бий болгож, төвлөрсөн дулаан хангамжид холбоно. Улаанбаатар хотын төвлөрлийг сааруулах зорилгоор нийслэлээс орон нутаг руу ажиллаж амьдрах иргэдийн санал санаачилгыг дэмжих бодлого боловсруулан хэрэгжүүлж, аян өрнүүлнэ. Дагуул хотуудыг бий болгож шинжлэх ухаан, технологи, инноваци, аялал жуулчлал, аж үйлдвэр, худалдааны чиглэлээр төрөлжүүлэн хөгжүүлнэ” гэх зэргээр олон жагсаалтыг тусгасан юм.
Цаасан дээр тогтоол төлөвлөгөө батлах, хөрсөн дээр бодитоор хэрэгжүүлэх хоёрын хооронд тэнгэр газрын зөрүү байгааг өнөөдөр гамшгийн хэмжээнд нүүрлэсэн агаарын бохирдол хэн хэнд хатуу санамж болж байгаа.
Ямартай ч намрын чуулган завсарлахын өмнө Агаарын бохирдлыг бууруулах тухай хуулийн төслийг УИХ хэлэлцэн батална. Гэхдээ энэ бүх хууль, тогтоолын хэрэгжилт, үр дүнг энэ өвөл, хавар бус ирэх жил харагдана. Гэвч олон нийтийн хувьд төр, засгийн шийдвэрийг хүлээхээс орчиндоо агаарын бохирдлыг бууруулах арга хэмжээ авч, хувийн эрүүл мэнд хамгаалах нь иргэний үүрэг болоод байна.
Н.Энхлэн
Уншиж байна |