УИХ-ын гишүүн О.Баасанхүү цаг үеийн асуудлаар мэдээлэл хийлээ. Өнгөрсөн баасан гаригт УДШ-ээс МАХН-ын даргаар О.Баасанхүүг бүртгэхээс татгалзсан шийдвэр гаргасан юм. Тэрбээр мэдээлэлдээ:

-УДШ-ийн шийдвэрийг бичгээр би аваагүй байна. Бичиг, баримт ойлгомжгүй байна гэсэн байвал би засаад аваачиж өгнө. Хэрвээ МАХН миний эрхэнд халдсан байх юм бол Захиргааны хэргийн шүүхэд хандана. Бадарчин баярлах болоогүй. Бичгээр Шүүхийн шийдвэр гараагүй байгаа учир нарийн зүйл яримааргүй байна.

Намайг МАХН-аас хөөлөө гэж найм дахь удаагаа хэлж байна. МАХН-ын удирдлагуудын хийсэн хэвлэлийн хурлын үйл явцыг харсан.  Манай намын удирдлагууд олон нийтэд намайг гэмт хэрэгтэн гэж зарласан. Би гэмт хэрэгтэн биш. Манай намын дарга Ц.Оюунбаатараас авахуулаад прокурорын шатанд гэмт хэрэгтэн болчих хүмүүс байгаа. МАХН байргүй. Яагаад гэвэл нэр бүхий бизнесмэн ашгийн бус байгууллага гэж бодоод энэ байрыг 500 мянган ам.доллараар өгсөн байдаг. Г.Шийлэгдамба гишүүний шүүх хуралд энэ сард болно. Гадаадад хэд хэдэн хүн зугатааж оргон зайлж байгаа. Жишээлбэл, нарийн бичгийн дарга Ангар гадаадад байгаа. МАХН шинэчлэл хийх ёстой. Хэрвээ шинэчлэл хийх байсан бол Тавантолгой, Оюутолгойг ард түмэнд өгөхгүй яасан юм.  Би намын дарга болоогүй. Намайг МАХН-ын эгэл жирийн гишүүд сонгосон. УДШ намын эгэл жирийн гишүүдийн шийдвэрийг хүчингүй болгох эрх байдаггүй хэмээгээд сэтгүүлчдийн асуултад хариуллаа.

“Та дараагийн их хуралд МАХН-ын даргад өрсөлдөх үү” гэсэн асуултад  тэрбээр “Хэрвээ жинхэнэ МАХН-ын гишүүд байвал намайг намын даргад өрсөлдөнө гэж мэдэж байгаа. Магадгүй би өөрийгөө дөвийлгэж байгаа юм биш. Одоо эгэл жирийн гишүүдийн хүсэлтийг харахад дараагийн их хурлаар МАХН-ын даргад өрсөлдвөл би ялах нь тодорхой. Гэхдээ эд нар дүр эсгэсэн, худал хуурмаг аргаар их хурал хийнэ" гэв. 

Н.Энх