Дэлхийн гоо бүсгүйг шалгаруулдаг “Miss Universe” тэмцээнд Монгол бүсгүй оролцох эрх нээгджээ.

Тус тэмцээнд дэлхийн 190 гаруй орны гоо бүсгүй оролцдог. Харин Монгол улсаас гоо бүсгүй оролцуулахаар таван жилийн хугацаанд хүсэлт  тавьсны үр дүнд ирэх оны “Miss Universe” тэмцээнд манай улс оролцох эрхтэй болсон байна. 

Энэ талаар тус миссийн тэмцээний лиценз эзэмшигчээр сонгогдсон “NTV” телевизийн хөтлөгч Ж.Анхбаяр “Дэлхийн 1.5 тербум үзэгчдийн анхаарлаа хандуулдаг “Miss Universe” тэмцээнд Монгол улс оролцох хүсэлт тавьсан ч өнгөрсөн таван жилийн хугацаанд манай улсыг багтаах боломжгүй гэсэн хариуг өгдөг байсан. Харин энэ жил Армени, Монгол гэсэн хоёр улсыг эгнээндээ нэгтгэхээр болсон. 2015 онд алдарт хөтлөгч Стив Харвэй титмийн эзнийг буруу зарласнаар “Miss Universe” тэмцээний нэр хүнд үлэмж хэмжээгээр өсч, цар хүрээгээрээ ижил төрлийн тэмцээнүүдээ хол хаясан байдаг” хэмээв.

“Miss Universe 2018” тэмцээнд эх орноо төлөөлөн оролцох гоо бүсгүйг 21 аймгаас сонгон шалгаруулахаар төлөвлөж байгаа аж. Сонирхуулахад тус миссийн тэмцээний зохион байгуулах эрхийг 1996 оноос АНУ-ын Ерөнхийлөгч Дональд Трамп эзэмшдэг болсон.

Г.Тэгшсүрэн