УИХ дахь АН-ын бүлгийн хурал өндөрлөлөө. Хуралдаанаар хэлэлцсэн асуудлаар УИХ дахь АН-ын бүлгийн дарга Д.Эрдэнэбат нар мэдээлэл хийв. УИХ дахь АН-ын бүлгийн дарга Д.Эрдэнэбат:
-Гишүүдийн ёс зүй, сахилга хариуцлагатай холбоотой асуудал гарч байгаа. Тиймээс УИХ-ын дэгийн тухай хуульд нэмэлт өөрчлөлт оруулах хэрэгтэй. Эд хөрөнгийн бүртгэлийн хуулийг хаврын чуулганаар хэлэлцэхээр төлөвлөсөн. Гэхдээ Бүртгэлийн хуулийг буцаасан байхад энэ хуулийг хэлэлцэх нь зүйтэй юу гэдгийг эргэж харах хэрэгтэй.
Үндсэн хуульд нэмэлт өөрчлөлт оруулах шаардлага байгаа. Гэхдээ Үндсэн хуулийн асуулга зөв үү, буруу юу гэдэг дээр АН-ынхан байр сууриа илэрхийлж байгаа. Монгол Улсын Их хурлын сонгуулийн тухай хууль, Улс төрийн намуудын тухай хуулийг хэлэлцэхээр төлөвлөсөн байгаа. Энэ нь Үндсэн хуульд нэмэлт өөрчлөлт оруулах төслийг хэлэлцэхээс хамаарна.
Бид цаг үеийн асуудлыг хэлэлцлээ. Нийгэмд дуулиан, шуугиан тариад байгаа асуудалд АН-ын бүлэг байр сууриа илэрхийлэх нь зүйтэй гэж үзлээ.
Уул уурхайн ордыг шалгах ажлын хэсэг байгуулсан. “Оюутолгой”-н асуудлаар АН-ын гурван хүнийг баривчилсан байна. Бид энэ асуудалд анхааралтай хандаж байгаа. “Оюутолгой”-н хөрөнгө оруулалтын гэрээг С.Баярын Засгийн газар баталсан. Тухайн үеийн Эрдэнэс баялгийн сайд Д.Зоригт хэлэлцээ хийх ажлын хэсгийг ахалсан. Гэтэл бусдыг нь шалгахгүйгээр зөвхөн АН-ын гурван хүнийг шалгаж байгаа нь улс төрийн шинж агуулагдсан байна гэж АН харж байгаа юм. Тиймээс адил тэгш хандах ёстой гэж харж байгаа.
“Эрдэнэт”-ийн 51 хувь буюу “Эрдэнэт” үйлдвэрийг Стандарт банкинд барьцаанд тавсан асуудалд УИХ-ын дарга ажлын хэсэг байгуулах хүсэлт өгсөн. Үнэн зөв мэдээллийг ард нийтэд хүргэх ёстой. Яагаад гэвэл Монгол Улсад учирсан бодит хохирол учир яаралтай шийдэх хэрэгтэй гэлээ. Тэрбээр мэдээлэл хийснийхээ дараа сэтгүүлчдийн асуултад хариулав.
-"Оюутолгой"-н асуудлаар шалгагдаж байгаа гишүүдээ АН хамгаалах уу? С.Баярцогтыг АН-ын гишүүнээс хөөсөн байгаа.
-АН хүнээ хамгаалалгүй яах вэ. Яагаад тухайн үеийн ажлын хэсгийн ахлагчаа шалгахгүй байна вэ. "Оюутолгой"-н гэрээг зөв авч явж, улс орноо хөгжүүлэх хэрэгтэй. Хэн нэгнийг ялласнаар Оюутолгой ашигтай болохгүй. Энэ асуудалд зөвхөн АН-ын гишүүдийг шалгаж байгаа нь улстөржсөн өнцөг харагдаад байна.
Н.Энх